Նազելի Բաղդասարյանի մարզպետական դիրքերը երերում են. ո՞վ կարող է փոխարինել նրան

Բավական երկար ժամանակ է, ինչ համառ լուրեր են պտտվում, որ վարչապետ Նիկոլ Փաշինյանը լուրջ դժգոհություններ ունի Շիրակի մարզպետ Նազելի Բաղդասարյանի աշխատանքից և վերջինս շուտով հրաժեշտ է տալու պաշտոնին: Այդ լուրերը կրկին արդիական դարձան այն բանից հետո, երբ իրավապահները օրը ցերեկով ասֆալտին փռեցին Բաղդասարյանի եղբորը՝ Արման Բաղդասարյանին, ով, հիշեցնենք, ավագանու նախկին անդամ է և բազմիցս աչքի է ընկել ՔՊ-ականների դեմ ուղղված հրապարակային քննադատություններով:

 

Հասկանալու համար, թե ով կարող է փոխարինել Նազելի Բաղդասարյանին, նախ պետք է հասկանալ, թե ինչ է կատարվում ՔՊ Շիրակի ներքին խոհանոցում:

 

Գյումրիում կայացած ՏԻՄ ընտրություններից հետո պարզ դարձավ, որ այն ժամանակվա գործող մարզպետ և Գյումրիում ՔՊ-ի նախընտրական ցանկը գլխավորող Հովհաննես Հարությունյանը պաշտոնից հեռացվելու է։ Այդպիսի պահանջ էր ներկայացվել հենց Շիրակի մարզի ՔՊ տարածքային կառույցը։ Ուշագրավն այն է, որ ընտրություններից առաջ ձևավորված «Քաղաքացիական պայմանագիր» կուսակցության՝ Գյումրու տարածքային խորհրդի կազմը և արդեն այստեղ ակնհայտ էր ներթիմային բախումը: Գյումրու տարածքային խորհուրդը բաղկացած է 9 անդամից: Նախագահը իշխող թիմի՝ Շիրակի մարզի կադրային հարցերի կնքահայրն է՝ այժմ արդեն արտակարգ իրավիճակների նախկին փոխնախարար Կարեն Սարուխանյանը, քարտուղարը՝ Ազգային ժողովի ՔՊ-ական պատգամավոր Էմմա Պալյանը, ով նախորդ խորհրդարանում, երբ Կարեն Սարուխանյանը պատգամավոր էր, նրա օգնականն էր, այն օգնականը, ով, օրինակ, սեփական կրեատիվ մտքերի բացակայությունը լրացնում էր, ասենք, Արմեն Աշոտյանի տեքստերը copy-paste անելով ու իր ղեկավարի էջում տեղադրելով: Հետաքրքիր է, որ ՔՊ-ի Գյումրու տարածքային խորհրդի ընտրություններին մասնակցել է նաև Շիրակի այն ժամանակվա մարզպետ Հովհաննես Հարությունյանը: Վերջինս, սակայն, չի ընտրվել խորհրդի նախագահ, ավելին, ըստ մամուլի տեղեկությունների, ստացել է մեկ ձայն՝ հավանաբար հենց իր ձայնը։ Խորհրդի կազմը, ըստ էության, համալրված է բացառապես Կարեն Սարուխանյանի մտերիմներով:

 

Ճիշտ է` Սարուխանյանը զիջեց դիրքերը հարազատ Ամասիայում ՔՊ-ի պարտությունից հետո, զրկվեց փոխնախարարի պաշտոնից, սակայն մարզում դեռևս չի հանձնվել: Ամասիայում էլ իր հերթին լարված իրավիճակը պահպանվում է, ՔՊ-ականներն այստեղ նոր գործընթաց են սկսել ընտրված համայնքապետի դեմ։ Այսպիսով, Կարեն Սարուխանյանին պայքարից դուրս համարելն առնվազն սխալ կլինի։

 

Դիրքային պայքարում չի նահանջում նաև պաշտոնից ազատված Հովհաննես Հարությունյանը։ Ինչպես գիտենք, Գյումրիում քաղաքապետի տեղակալի պաշտոնին հավակնում էր ՔՊ-ի ցուցակի երրորդ համարը՝ Գյումրու «Ինֆեկցիոն» հիվանդանոցի տնօրեն Աստղիկ Բեյբությանը։ Այս հարցում շահագրգիռ էր անձամբ Հարությունյանը, սակայն, ինչպես գիտենք, հաջողության չհասավ։ Մամուլը գրել էր, որ այժմ էլ Բեյբությանին փորձում են առողջապահական հաստատության ղեկավար նշանակել, քանի որ «Ինֆեկցիոն» հիվանդանոցը լուծարվել և միացել է «Գյումրու» ԲԿ-ին, և տնօրենի պաշտոնից Բեյբությանը վերածվել է համակարգողի։ ԲԿ-ն յուրայիններով կոմպլեկտավորելը նույնպես պայքար է ազդեցության լծակների համար: Բացի այդ, մարզպետարանում դեռևս քիչ չեն, այսպես կոչված, Հովհաննիսյանի կադրերը, քանի որ Նազելի Բաղդասարյանը հապաղում է կադրային «չիստկա» կազմակերպելու հարցում:

Նշանակումից հետո Շիրակի մարզպետարանի պաշտոնական ֆեյսբուքյան էջում գերակշռում են հենց երկու փոխմարզպետների գործունեության, հանդիպումների մասին ռելիզները, իսկ ահա Նազելի Բաղդասարյանը թեև, անշուշտ, փորձում է պահել պլանկան, սակայն, ակտիվության մակարդակով ակնհայտորեն գտնվում է իր տեղակալների ստվերում: 1957 թվականին ծնված Ալբերտ Այվազյանն Առափի համայնքի 31 տարվա գյուղապետն էր, մասնագիտությամբ գյուղատնտես է, երկու տարի աշխատել է որպես Առափիի գլխավոր գյուղատնտես, 5 տարի էլ՝ Ախուրյանի շրջկոմում։ Նա դեկտեմբերի 5-ին  ՔՊ-ի կողմից մասնակցում էր Ախուրյան խոշորացված համայնքի ՏԻՄ ընտրություններին, իշխող ուժի համայնքապետի թեկնածուն էր, սակայն պարտվեց: Չի բացառվում, որ Փաշինյանը նոր մարզպետ նշանակի ոչ թե իր հետ քայլած ՔՊ-ականներից, այլ դիմի այն քայլին, որը վերջին շրջանում ՔՊ-ականներին բավական նյարդայնացնում է, ասել է թե՝ պաշտոն շնորհի հեղափոխության հետ առանձնապես կապ չունեցող անձանց:

Հաշվի առնելով, որ Նազելի Բաղդասարյանի դիրքերը մարզում և ինչն էլ ավելի կարևոր է՝ Փաշինյանի աչքերում երերում են, և հաշվի առնելով, որ մարզում հիմնական խաղի կանոնները թելադրում են վերը նշված անձինք, ապա Փաշինյանից է կախված, թե ի վերջո ում վրա կանգ կառնի նրա ընտրությունը...