Ինչպես կհանգուցալուծվի գլխավոր ինտրիգն առողջապահության նախարարությունում

Արդեն բավական երկար ժամանակ է, ինչ թափուր է մնացել առողջապահության նախարարի տեղակալներից մեկի պաշտոնը, և Փաշինյանը չի շտապում այն համալրել ՔՊ-ականներից որևէ մեկով:

Ըստ էության, տպավորություն է ստեղծվում, որ այս պաշտոնի համար թեև ոչ բացահայտ, սակայն, այնուամենայնիվ որոշակի կուլիսային պայքար է գնում: Մամուլը գրել էր, որ նախարար Անահիտ Ավանեսյանը պատրաստվում է այդ պաշտոնին նշանակել իր ընկերուհուն՝ առողջապահության նախարարության գլխավոր քարտուղար Վարդուհի Գրիգորյանին։ 

Հեղափոխությունից հետո Նիկոլ Փաշինյանի որոշմամբ՝ Լուսինե Քոչարյանը նշանակվել էր առողջապահության նախարարության գլխավոր քարտուղար։ Համաձայն մամուլում առկա տեղեկությունների՝ վերջինիս հովանավորյալը հանդիսացել էր  ՀՀ առողջապահության նախարարի տեղակալ Լենա Նանուշյանը, իսկ Լուսինե Քոչարյանը եղել է ԱՆ բժշկական քաղաքականության վարչության պետ, ապա աշխատակազմի ղեկավար, հետո էլ մրցույթով նշանակվել է որպես առողջապահության նախարարության գլխավոր քարտուղար։ Սակայն, Անահիտ Ավանեսյանի նախարար նշանակվելուց հետո Նանուշյանի կադրը հեռացավ զբաղեցրած պաշտոնից և այդ պաշտոնում նշանակվեց արդեն Անահիտ Ավանեսյանի ընկերուհին՝ Վարդուհի Գրիգորյանը: Չի բացառվում, որ Նանուշյանը փորձի այսպես ասած՝ ռևանշ վերցնել և փորձել ամեն դեպքում Քոչարյանին վերադարձնել նախարարություն, այն էլ՝ պաշտոնի բարձրացմամբ:

Նախարարությունից դեռևս չի կտրվել նաև նախկին նախարար Արսեն Թորոսյանը: Հիշեցնենք՝ նա, ըստ մամուլի հրապարակումների, ցանկանում էր իր մտերիմ կադրերից՝ Ծաղիկ Վարդանյանին ցանկանում էր քաղաքապետարանում աշխատանքի տեղավորել: Վարդանյանը առողջապահության նախարարության հնաբնակներից է։ Նախարարները պարբերաբար փոխվում էին, սակայն Վարդանյանը իր պաշտոնը պահում էր այդ գերատեսչությունում։ 2018-ի հայտնի իրադարձություններից հետո էլ նախկին ՀՀԿ-ական Վարդանյանը կարողացավ մտերիմ հարաբերություններ հաստատել այդ ժամանակ նախարար նշանակված Արսեն Թորոսյանի հետ և պահպանել պաշտոնը, սակայն գործող նախարար Անահիտ Ավանեսանի հետ ունի լարված հարաբերություններ, ինչի արդյունքում էլ վերջինիս աշխատանքից ազատել էին այս տարվա հունվարին: Սակայն, ինչպես ասում են, եթե Թորոսյանին հաջողվի համոզել Փաշինյանին, որ փոխնախարարի պաշտոնում Վարդանյանը առավել օգտակար կլինի ՔՊ ընդհանուր գործին, ապս դժվար թե Ավանեսյանը, ում դիրքերը վերջին շրջանում բավական թուլացել են, ընդդիմանա: