Չինաստանում մեկ օրում կորոնավիրուսով վարակվել է 37 միլիոն մարդ․ Bloomberg

Չինաստանում դեկտեմբերի 20-ին կորոնավիրուսով վարակվել է 37 միլիոն մարդ։ Այս մասին գրում է Bloomberg-ը՝ հղում անելով Առողջապահության ազգային հանձնաժողովի փակ նիստին։

Ընդհանուր առմամբ, դեկտեմբերի առաջին 20 օրվա ընթացքում կորոնավիրուսով վարակվել է 248 մլն մարդ, այսինքն՝ երկրի բնակչության գրեթե 18%-ը։ Հանդիպման արձանագրության մեջ չի նշվում, թե քանի մարդ է մահացել։

Ինչպես նշում է Bloomberg-ը, նոր դեպքերի կտրուկ աճը կարող է պայմանավորված լինել այն հանգամանքով, որ Չինաստանի իշխանությունները վերացրել են սահմանափակումները, որոնք սահմանվել էին որպես COVID-19-ի նկատմամբ զրոյական հանդուրժողականության քաղաքականության մաս։ Սա հանգեցրել է վիրուսի օմիկրոն տարբերակի տարածմանը բնական իմունիտետի ցածր մակարդակ ունեցող բնակչության շրջանում: Նշվում է, որ Պեկինի և Սիչուան նահանգի բնակիչների կեսից ավելին վարակվել է կորոնավիրուսով։

Bloomberg-ի հրապարակումից հետո Չինաստանի արտաքին գործերի նախարարության խոսնակ Մաո Նինը հայտարարել է, որ երկրում կորոնավիրուսային իրավիճակը «կանխատեսելի է և վերահսկելի»: