Ղալումյանի ֆեոդալական նկրտումները դուր չեն եկել ՔՊ-ականներին. Փաշինյանը աչք կփակի՞

Թեև հեղափոխությունից հետո Նիկոլ Փաշինյանը հայտարարում էր, որ իր ղեկավարած կուսակցության ներսում չեն կարող լինել թևեր և տարբեր թիմեր, որոնք կպայքարեն մեկը մյուսի դեմ, ժամանակը ցույց տվեց, որ հեղափոխական պաշտոնյաներն էլ իշխանության համը զգալուց հետո չեն կարողացել դիմադրել գայթակղությանը և այդ  իշխանության համար պայքարում դեմ են դուրս եկել անգամ մեկը մյուսի դեմ:

Դիցուք՝ Տավուշում ՔՊ-ի մի թևը ղեկավարում է մարզպետ Հայկ Ղալումյանը և վերջինիս եղբայրը, պատգամավոր Վահե Ղալումյանը: Հայկ Ղալումյանը Նիկոլ Փաշինյանի քավորն է և հենց սրանով է պայմանավորված նրա ունեցած իշխանությունը և լծակները: Միևնույն ժամանակ մարզպետը և եղբայրը հասցրել են հայտնվել սկանդալային պատմությունների կիզակետում, երբ գործի էին դրել ձեռք բերված լծակները: Այսպես օրինակ, ավագանու անդամ Դավիթ Խաժակյանը հայտարարել էր, որ «Ռաշն Վոյաժ» ընկերությունը՝ կեղծելով բանկային երաշխիքը, մասնակցել է բազմաբնակարան շենքերի մուտքերի վերանորոգման մրցույթին, որի արժեքը մոտ 600 մլն դրամ է եղել։ Խաժակյանը նաև բացահայտել էր, որ ընկերության սեփականատերը Վահագն Ղալումյանն է, ով Ղալումյանների ազգականն է: Բնականաբար, Հայկ Ղալումյանը անում է ամեն հնարավորն ու անհնարինը, որպեսզի տարբեր պաշտոններում տեղավորվեն հենց իր յուրայինները, դիցուք՝ ԵՊՀ Իջևանի մասնաճյուղի տնօրեն նշանակվի իր ընկերը՝ շարքային դասախոս Հայկ Քամալյանը: Հայկ Ղալումյանի միջնորդությամբ Իջևանի անտառտնտեսության տնօրեն է նշանակվել իր ընկեր Մհեր Ղալթաղչյանը։ Երկու տարի առաջ Իջևանում տեղի ունեցան անօրինական ծառահատումների դեմ պայքարի իմիտացիա և ոստիկանական ռեպրեսիաներ։ 

Այն, որ Ղալումյանը Տավուշում գրեթե ֆեոդալական կարգեր է հաստատել՝ բնականաբար անգամ ՔՊ-ականների սրտով չէ և նրանք փորձում են հակակշռել վերջինիս: Սա հանգեցրել է նրան, որ Տավուշում ՔՊ-ականների միջև լարված հարաբերություններ են հաստատվել և բավական լուրջ պայքար է մղվում յուրայիններին տարբեր պաշտոնների նշանակելու և այդ միջոցով սեփական դիրքերը ամրապնդելու համար:

ՔՊ-ական մյուս թևը ղեկավարում է Դիլիջանի համայնքապետ ընտրված Դավիթ Սարգսյանը, նա բավական ծանր ներթիմային պայքարում կարողացավ ընտրվել ՔՊ Դիլիջանի տարածքային խորհրդի նախագահ և դա էլ իր հերթին վերջինիս բավական լուրջ գործիքակազմ է տալիս: Թեև Սարգսյանը նույնպես ցանկանում է մարզում հնարավորինս շատ յուրայիններ ունենալ առանցքային պաշտոններում, նրա այդ նկրտումները դեռևս հանդիպում են Ղալումյանների կազմակերպված դիմադրությանը:

ՔՊ-ի տավուշյան մյուս թևը ղեկավարում է Իջևանի համայնքապետ Արթուր Ճաղարյանը: Վերջինս, ըստ մամուլի հրապարակումների, բավական սերտ կապեր ունի Նիկոլ Փաշինյանի զարմիկ Սիփան Փաշինյանի հետ, ով էլ ընտրություններից առաջ Իջևանում հենց Ճաղարյանի ընտրվելու պրոցեսի կուռացիան էր անում: Վերջինս բավական լավ հարաբերություններ ունի նաև մարզպետի հետ, սակայն որոշ առումով ունի նաև ինքնուրույնություն  և կարողանում է իր սեփական խաղը խաղալ:

Ըստ էության, Տավուշում իշխանության համար ներթիմային պայքարի երեք հիմնական առաջամարտիկները հենց վերը նշված պաշտոնյաներն են, և նրանք են, որ փորձում են մարզի խնդիրները մի կողմ դրած՝ աշխատել միայն հավելյալ իշխանական լծակներ ձեռ գցելու և մարզում սեփական դիրքերն ամրապնդելու ուղղությամբ: Հարց է, թե դեռ որքան ժամանակ է Նիկոլ Փաշինյանը աչք փակելու իր քավորի ֆեոդալական նկրտումների վրա և որքան ժամանակ է համառորեն պահելու նրան այս պաշտոնում...