Միայն Պուտինը կարող է վերջ դնել Ուկրաինայի հակամարտությանը. Դրագի

Իտալիայի նախկին վարչապետ Մարիո Դրագին կարծում է, որ Ուկրաինայում հակամարտությունը դադարեցնելը միայն Ռուսաստանի նախագահ Վլադիմիր Պուտինի իրավասությունն է: Այս մասին նա ասել է Corriere della Sera թերթին տված հարցազրույցում։

Նրա խոսքով, դժվար է խոսել Ռուսաստանի և Ուկրաինայի միջև խաղաղության հաստատման մասին, սակայն վերջին շրջանում զգալի փոփոխություններ են տեղի ունեցել. կապի ուղիներն ավելի բաց են դարձել, Չինաստանն ավելի ակտիվ ներգրավվել է բանակցությունների կազմակերպման մեջ։

Դրագին կարծիք է հայտնել, որ Կրեմլը մինչ այդ ցույց էր տվել, որ խաղաղություն չի ուզում։ Քաղաքական գործիչը հիշեցրել է, որ իր կառավարությունը, գործելով մինչև հոկտեմբերի 22-ը, միշտ ձգտել է խաղաղության և դրա համար փորձել է անել հնարավոր ամեն ինչ:

«Բայց միայն նախագահ Պուտինը կարող է վերջ դնել այս կոտորածին», - ասել է Իտալիայի նախկին վարչապետը:

Նա հավելել է, որ Իտալիան միշտ աջակցել է Ուկրաինային և միացել է Եվրամիության հակառուսական պատժամիջոցներին՝ չնայած Ռուսաստանի հետ նախկին սերտ կապերին։ Դրագին նշել է, որ Իտալիայի դիրքորոշումն ուկրաինական հակամարտության վերաբերյալ, հավանաբար, ավելի ամուր և վճռական է եղել, քան շատ դիտորդներ սպասում էին: