Իսրայելում հայտնաբերվել է «Հիսուսի մանկաբարձուհու» գերեզմանը

Իսրայելի հնությունների վարչությունն ավարտել է Լաhիշ անտառում գտնվող 2000 տարվա վաղեմության քարանձավի` Սալոմեի դամբարանի պեղումները: Այս մասին հաղորդվում է կազմակերպության կայքում։

Երուսաղեմից մոտ 50 կիլոմետր հեռավորության վրա գտնվող քարանձավը հայտնաբերվել է 40 տարի առաջ գանձագողերի կողմից, իսկ պեղումները սկսվել են 1980-ականների վերջին: Դամբարանը գտնվում է ավելի քան 350 քառակուսի մետր տարածքի վրա՝ ներառյալ դեպի իրեն տանող բակը։ Նշվում է, որ հին ժամանակներում դամբարանում թաղված են եղել ազնվական հրեական ընտանիքների ներկայացուցիչները։ Պեղումների ընթացքում հայտնաբերվել են նաև խանութներ, որտեղ, ըստ հնագետների, վաճառվել կամ վարձակալվել են կավե լամպեր։

Ինչպես նկարագրում են հետազոտողները, դամբարանի հատակները պատված են խճանկարներով, իսկ քարե պատերին փորագրված են նախշեր ու գծանկարներ, ինչը ցույց է տալիս, որ մատուռը նվիրված է եղել Սուրբ Սալոմեին։ Համաձայն ապոկրիֆների՝ նա մանկաբարձուհի էր Բեթղեհեմից, ով ներկա է եղել Հիսուսի ծննդյան ժամանակ: Գիտնականները եկել են այն եզրակացության, որ տեղացիները քարանձավը համարում էին կնոջ թաղման վայր։