Էրեբունու բնակիչների բողոքը հասել է սոցցանցեր. ինչո՞վ է զբաղված Հակոբ Բալայանը

Այս տարվա հունիսին Էրեբունի վարչական շրջանի ղեկավար է նշանակվել Հակոբ Բալայանը: Երևանի քաղաքապետարանի պաշտոնական կայքում տեղադրված կենսագրությունից պարզ է դառնում, որ Բալայանը պետական կառավարման ոլորտում ունեցած աննախադեպ հաջողություններով և փորձով չի փայլում՝ իր շատ ու շատ գործընկերների նման: Դիցուք՝ վերջինս 2014-2015թթ. աշխատել է «Երևան» բժշկական կենտրոնում՝ որպես փոխտնօրեն: 2015-2018թթ. աշխատել է «Երևան» բժշկական կենտրոնում՝ որպես տնօրեն: 2018թ. հոկտեմբերի 29-ին նշանակվել է Էրեբունի վարչական շրջանի ղեկավարի տեղակալ: 

Թե որքանով ԲԿ-ի ղեկավարը կարող  է նույնչափ արդյունավետ ղեկավարել մի ամբողջ համայնք՝ դժվար է ասել: Ի դեպ, Հակոբ Բալայանը Սերժ Սարգսյանի նախկին խորհրդարական Զորի Բալայանի զարմիկն է: Փաստացի ՔՊ-ում չեն խորշել համայնքի ղեկավարի պաշտոնում նշանակել ոչ միայն տվյալ պաշտոնի համար ոչ կոմպտենտ, դեռ մի բան էլ նախկինների հետ կապ ունեցող անձի:

Ինչ վերաբերվում  է Բալայանի գործունեությանը, ապա նշենք, որ այն աչքի չի ընկնում առանձնահատուկ ակտիվությամբ և արդյունավետությամբ: Սակայն, այս ընթացքում թաղապետարանը հասցրել է հայտնվել մամուլի ուշադրության կենտրոնում: Դիցուք՝  Երևանի էրեբունի համայնքում գտնվող «Վարդավառ» զբոսայգում շինարարություն է։ Լճի հարակից վազքուղու մյուս կողմում, էրեբունու նախկին թաղապետ Մհեր Սեդրակայնի եղբոր առանձնատնից ոչ հեռու պատ է կառուցվում։ Ըստ քաղաքապետարանի՝ հենապատ է։ Այս շինարարության մասին «Ազատությանն» ահազանգել էր տարածքի բնակիչներից մեկը, ով չցանկացավ ներկայանալ։ Շինաշխատանքները նկատել են նաև այգում մարզվողները։ Բանն այն է, որ, թաղամասի բնակիչները կասկածներ ունեն, որ առաձնատան հարակից այգին պարսպապատվում է, որ օգտագործվի մասնավոր նպատակներով։ Զբոսայգին պատկանում է քաղաքապետարանին, սակայն 2009 թվականից 99 տարով տրված է վարձակալության։ Սա դեռ բավարար չէ, այգու տարածքում բազմաթիվ օտարված հողակտորներ կան։ Թաղապետարանը այս հարցերի պարզաբանում մինչ օրս չի տվել, իսկ քաղաքապետարանը տալիս է, սակայն՝ կցկտուր:

Ինչ վերաբերվում է թաղապետի բուռն աշխատանքին, ապա վարչական շրջանի ֆեյսբուքյան պաշտոնական էջից տեղեկանում ենք, թե ինչ կարևոր միջոցառումներ են տեղի ունեցել այս ընթացքում: Դիցուք՝ դեկտեմբերի 15-16-ը Երևանի «Ասպար» հրաձգարանում անցկացվեց հրաձգության մրցաշար՝ Երևանի քաղաքապետարանի աշխատակազմի, վարչական շրջանների և Երևան քաղաքի ավագանու անդամների միջև, սանմաքրման աշխատանքներ են տարվել վարչական շրջանի տարբեր հատվածներում, էրեբունու ղեկավարը պարգևատրել է Միքայել Մալունցյանի անվան արվեստի դպրոցի մանկավարժական կազմին և մասնակցել տարեվերջյան միջոցառմանը։ Նորությունների մյուս հատվածը ավելի շատ հիշեցնում է նախընտրական խոստումների հավաքածու՝ գարնանը  կսկսվեն կոյուղու խողովակաշարերի նորոգման և փոխարինման աշխատանքները, համար 72 մանկապարտեզի վերանորոգումը կմեկնարկի հաջորդ տարի: 

Քաղաքացիները սոցիալական ցանցերում իրենք են իրենց մեկնաբանություններով գնահատականներ հնչեցնում վարչական շրջանի ղեկավարության աշխատանքին։