Վարչական շրջանի ղեկավարը PR-ով է զբաղված. ինչո՞ւ են արաբկիրցիները դժգոհում Արամ Ազատյանից

Այս տարվա մարտին Երևանի քաղաքապետ Հրաչյա Սարգսյանի որոշմամբ Արաբկիր վարչական շրջանի ղեկավար է նշանակվել Արամ Ազատյանը։ Նա մինչ այդ պաշտոնին անցնելը զբաղեցնում էր մարզահամերգային համալիրի փոխտնօրենի պաշտոնը:

Դիտարկենք, թե ինչով է այս ընթացքում զբաղված եղել Արաբկիր համայնքի ղեկավարը: Դա պարզ է դառնում վարչական շրջանի ֆեյսբուքյան էջին գցած մեկ հայացքից անգամ: Եվ այսպես՝ Ազատյանը պատվոգրերով ու հուշամեդալներով է պարգևատրել «Կանաչապատում և շրջակա միջավայրի պահպանություն» ՀՈԱԿ-ի ղեկավար Արմեն Բեգոյանին և «Երևանի աղբահանություն և սանիտարական մաքրում» հիմնարկի տնօրեն Հովհաննես Մանուկյանին: Աստիճանահարթակի վերականգնման աշխատանքներ են տարվել Արաբկիրի Ջեյմս Բրայս փողոցում, որից բնակիչները, կարծես թե, այնքան էլ գոհ չեն:

Բնակիչների բողոքները վերաբերվում են նաև ապօրինի կառույցները ապամոնտաժելու տեմպերին։

Արաբկիրի բնակիչները նաև կասկածներ ունեն, որ վարչական շրջանի ղեկավարությունը փորձում է փիառվել չնչին գործերով՝ չլուծելով, սակայն, համայնքի բնակիչների առանցքային խնդիրները։

Ազատյանի ղեկավարման ընթացքում արտակարգ դեպքեր էլ գրանցվեցին: Դիցուք՝ Հայաստանի քննչական կոմիտեի Երևան քաղաքի քննչական վարչության Արաբկիրի քննչական բաժնում նախաձեռնվել է վարույթ նոյեմբերի 24-ին Արաբկիր վարչական շրջանի ղեկավարի աշխատավայրում տեղի ունեցած միջադեպի փաստով։ Երևանի բնակիչ Հակոբ Գրիգորյանը ահազանգել է Արաբկիրի ոստիկանություն և հայտնել, որ մի քաղաքացի առանց թույլտվության՝ մուտք է գործել Արաբկիր վարչական շրջանի ղեկավարի աշխատակազմի իր աշխատասենյակ, դրսևորել ոչ ադեկվատ պահվածք, իր հասցեին հնչեցրել է հայհոյանքներ, կոպիտ կերպով խախտել թաղապետարանի բնականոն աշխատանքը։