Կենտրոնի թաղապետի աշխատանքային «բուռն» իմիտացիան. ինչով է զբաղված Սամվել Ղուկասյանը

Այս տարվա սկզբին Երևանի քաղաքապետ Հրաչյա Սարգսյանը որոշում էր ստորագրել, որով Սամվել Ղուկասյանը նշանակվել է Կենտրոն վարչական շրջանի ղեկավար:

Վերջինիս անունը միանգամից հայտնվեց մամուլում՝ կապված աղմկահարույց սկանդալի հետ: Ժողովուրդ օրաթերթի տեղեկությունների համաձայն՝ Երևանի Կենտրոն վարչական շրջանի ղեկավարին և տեղակալներին հենց աշխատասենյակում ծեծի են ենթարկել: Պատմությունը կապված է Երևանի Կենտրոնում գտնվող խաղահրապարակի հետ. բնակիչները երկար ժամանակ դիմել են Կենտրոն վարչական շրջանի ղեկավարին, տեղակալներին՝ խնդրելով բարեկարգել իրենց բակի տարածքը, սակայն ոչինչ չի արվել: Մոտ մեկ ամիս առաջ Երեւանի կենտրոնի մի քանի բնակիչներ գնացել են թաղապետարան՝ պարզաբանումներ ստանալու: Խոսակցությունը փոխթաղապետ Ռոմանոս Սաֆարյանի սենյակում է ծավալվել ու չի ստացվել, քանի որ փոխթաղապետը օգտագործել է պաշտոնյային ոչ հարիր բառապաշար՝ «սպրո՞ս եք անում» հարցադրումով: Երեւանի բնակիչներն էլ, որոնցից մեկը քրեական աստիճանակարգով բարձրագույն կոչում է ունեցել, բացատրել է, որ իրենք այդ նպատակով չեն եկել: Այսպես, փոխթաղապետ Ռոմանոս Սաֆարյանի հետ քաշքշուկ է եղել, քարտուղարուհին շտապ կանչել է մյուս փոխթաղապետին՝ Նիկոլայ Սարիբեկյանին: Այնուհետեւ սենյակ է եկել թաղապետ Սամվել Ղուկասյանը, որոնք բոլորն էլ հասցրել են հարվածներ ստանալ հենց աշխատասենյակում»,-գրել էր թերթը:

Ղուկասյանը իր հերթին հանդես էր եկել պարզաբանմամբ՝ հայտարարելով, որ նման դեպք չի արձանագրվել և պատմությունը մտացածին է:

Ղուկասյանի պաշտոնավարման մեխը որքան էլ զարմանալի է, սակայն ոչ թե կառուցող և բարեկարգվող ենթակառուցվածքներն են, այլ դրանց ապամոնտաժումը: Այն բանից հետո, ինչ Տիգրան Ավինյանը փաստացի սկսեց իր նախընտրական քարոզարշավը՝ թաղապետերը մեկը մյուսին հերթ չտալով փորձում են կյանքի կոչել վերջինիս՝ ամեն բան քանդելու տեսլականը և այդ ընթացքում շատ դեպքերում անգամ աչք են փակում օրենքի պահանջների վրա: Դիցուք՝ օրեր առաջ Հանրապետության հրապարակում ապամոնտաժվող հերթական կրպակի սեփականատիրոջ փաստաբանը ահազանգում էր, որ  կրպակի ապամոնտաժումը ապօրինի և ոչ իրավաչափ է եղել, քանի որ դատարանը այդ հարցի վերաբերյալ հայցի ապահովման միջոց է կիրառել, ինչը նշանակում է, որ կրպակը չպիտի ապամոնտաժվեր, քանի դեռ դատարանը վճիռ չէր կայացրել: Ընդհանուր առմամբ Ղուկասյանի պաշտոնավարման ընթացքում ապամոնտաժման աշխատանքներ են իրականացվել Օղակաձև զբոսայգու 6-րդ հատվածում Վարդան Մամիկոնյանի արձանի հարակից տարածքում, Եր.Քոչարի 4/2 հասցեում, Խանջյան 6 հասցեում, Օղակաձև զբոսայգու 5-րդ հատվածի Սայաթ-Նովա պողոտա 26/4 հասցեում, Օղակաձև զբոսայգու 3-րդ հատվածում՝ Կամերային Երաժշտության Ազգային Կենտրոնի ետնամասում, Օղակաձև զբոսայգու 2-րդ հատվածում՝ Կարեն Դեմիրճյանի անվան Երևանի մետրոպոլիտենի Երիտասարդական կայարանի ետնամասում և Իսահակյան փողոց 5/6, 5/3 և 5/2 հասցեներում: Միևնույն ժամանակ կենտրոնի բնակիչները շարունակում են բողոքել և անում են դա հրապարակավ։

Վարչական շրջանի ղեկավարին մինչ օրս այդպես էլ չի հաջողվել լուծել փողոցային առևտրի կանոնակարգման խնդիրը: Ամիսներ առաջ առևտրի և սպասարկումների բաժինը ամենօրյա ռեժիմով սկսեց իրականացնել ուժեղացված հսկողություն: Կենտրոն վարչական շրջանի թաղապետարանի աշխատակիցները փողոցից հեռացնում էին առևտուր իրականացնող մարդկանց: Նրանք հավաքեցում էին մթերքներով լի և դատարկ արկղերը: Թվում էր՝ թե խնդիրը լուծվելու էր, սակայն աշխատակիցների հեռանալուց հետո Կենտրոնում մարդիկ գալիս և շարունակում էին իրականացնել փողոցային առևտուրը: