Պուտինն ու Փաշինյանը մանրամասն քննարկել են Լաչինի միջանցքում ստեղծված իրավիճակը. Պեսկով

Ռուսաստանը կշարունակի նպաստել Հայաստանի և Ադրբեջանի միջև կարգավորմանը, վստահեցրել է ՌԴ նախագահի մամուլի քարտուղար Դմիտրի Պեսկովը, գրում է ՏԱՍՍ-ը։

«Ռուսաստանի Դաշնությունը շարունակում է և մտադիր է շարունակել իր միջնորդական ջանքերը՝ կատարելով առաջին հերթին այն պայմանավորվածությունները, որոնք ձեռք են բերվել եռակողմ հիմունքներով»,- հինգշաբթի օրը լրագրողներին ասել է Կրեմլի խոսնակը։

Նա ասել է, որ ՌԴ նախագահ Վլադիմիր Պուտինը և Հայաստանի վարչապետ Նիկոլ Փաշինյանը երեքշաբթի ԱՊՀ ոչ պաշտոնական գագաթնաժողովի շրջանակներում քննարկել են Լաչինի միջանցքի թեման։ «Լաչինի միջանցքի թեման իսկապես շատ մանրամասն քննարկվել է նախօրեին Սանկտ Պետերբուրգում Պուտինի և Փաշինյանի միջև, այդ թեմայով խոսակցությունները կշարունակվեն»,- ասել է Կրեմլի խոսնակը։ «Մենք իսկապես մտահոգված ենք լարվածությամբ, որն այժմ առաջացել է Լաչինի միջանցքի շուրջ»,- ընդգծել է նա։

Պեսկովը վստահեցրել է, որ «ռուսական կողմը կշարունակի իր աշխատանքն ու ջանքերը թե՛ Երևանի, թե՛ Բաքվի հետ շփումներում»։