Նորք Մարաշի չլուծվող խնդիրները. ինչո՞վ է զբաղված Միքայել Օհանյանը

Այս տարվա ապրիլին Երևանի Նորք Մարաշ վարչական շրջանի ղեկավար նշանակվեց Միքայել Օհանյանը: Վերջինիս կենսագրությունից պարզ է դառնում, որ Օհանյանը աշխատել է ինչպես պետական, այնպես էլ մասնավոր սեկտորում: Դիցուք՝ 2011- 2012թթ. աշխատել ՀՀ աշխատանքի և սոցիալական հարցերի նախարարության «Նորք» տեղեկատվավերլուծական կենտրոնում՝ որպես ծրագրավորող: 2017 - 2018թթ. եղել է «Նոր կապիտալ» ՍՊԸ-ի հիմնադիր և համասեփականատեր: 2019թ. եղել է «Նեսթ կապիտալ» ՍՊԸ-ի հիմնադիր տնօրենը: 2021թ. եղել է «Բլեք սիթի» ՍՊԸ-ի համասեփականատերը: 2021թ. եղել է «Գիմեքս» ՍՊԸ-ի համասեփականատերը:

Վերջինս թեև անգամ չի հասցրել աչքի ընկնել բուռն աշխատանքային գործունեությամբ, սակայն, բողոքները նրա աշխատանքից քիչ չեն: Մամուլը գրել էր, որ ամիսներ շարունակ Գ. Հովսեփյան փողոցի 91 հասցեի մոտ տեղադրված մի քանի դիտահորերից կեղտաջրերը ողողում են մի ամբողջ փողոց, իսկ  վարչական շրջանի  ղեկավար Միքայել Օհանյանն ու վարչական շրջանի կոմունալ բաժնի պետ Գևորգ Գրիգորյանը ասես  «ուղտի ականջում քնած լինեն: Օհանյանի նշանակվելուց հետո ոչ թաղապետը, ոչ էլ նա չեն բարեհաճում գոնե մեկ անգամ գան նշված վայր և ստիպեն «Վեոլիա Ջրին», քանի որ, ըստ թաղապետարանի պաշտոնյաների, պատասխանատուն «Վեոլիա Ջուր»-ն է, խնդիրը վերջնականապես լուծեն, իսկ կոմունալի պետ Գ. Գրիգորյանը անգամ չի բարեհաճում արդեն պատասխանել բնակիչների հեռախոսազանգերին: Ստացվում է՝ վարչական շրջանի ղեկավարը պարզապես աչք է փակում հակասանիտարական վիճակի վրա:

Մեկ այլ բողոք էլ կապված էր փողոցներից մյուսում առկա նմանատիպ իրավիճակի հետ: Արդեն մի քանի օր է՝ լրատվամիջոցները հեռախոսազանգեր են ստանում Նորք-Մարաշի Արմենակյան փողոցի բնակիչներից, գիշերային ժամերին՝ նաև վարորդներից, ովքեր արդարացիորեն բողոքում են, որ նշված փողոցի որոշ հատվածներում կոյուղատարերից դուրս են գալիս կեղտաջրերը ու անարգել հոսում Արմենակյան փողոցով։ Եվ երբ երեկոյան ժամերին փորձում ես նշված վայրով երթևեկել, ապա հայտնվում ես սահադաշտում։

Ինչն այս ընթացքում Օհանյանի մոտ լավ է ստացվել, դա շաբաթօրյակներն են: Վարչական շրջանում դրանք կազմակերպվում են պարբերաբար, ինչը թերևս գովելի է, սակայն, վատ է այն, որ մյուս առանցքային խնդիրները այդպես էլ մնում են չլուծված: Մյուս հույժ կարևոր գործերից կարող ենք առանձնացնել այն, որ Միքայել Օհանյանի նախաձեռնությամբ «Ճանաչի'ր կենդանիներին» ծրագրի շրջանակում կազմակերպվեց էքսկուրսիա դեպի «Երևանի կենդանաբանական այգի»՝ թվով 40 դպրոցահասակ երեխաների մասնակցությամբ, բարեկարգվել է մանկապարտեզի ցանկապատը,  վարչական շրջանում բնակվող տարեցների մասնակցությամբ կազմակերպվեց ճանաչողական էքսկուրսիա դեպի պատմամշակութային վայրեր հետևյալ երթուղով՝ Արագածոտնի մարզի Սուրբ Հովհաննես եկեղեցի, Սուրբ Տեղերի վանք և Արշակունիների դամբարան:

Չնայած նրան, որ ըստ վարչական շրջանի ֆեյսբուքյան պաշտոնական էջի՝ տարվա ընթացքում իրենք աշխատել են կոյուղագծերի վերանորոգման ուղղությամբ, բնակիչների բողոքները հասել են նաև սոցիալական ցանցեր: