ԻՊ-ը ստանձնել է հունվարի 1-ին Քաբուլի ռազմական օդանավակայանում տեղի ունեցած պայթյունի պատասխանատվությունը. Reuters

«Իսլամական պետություն» միջազգային ահաբեկչական կազմակերպությունը ստանձնել է Քաբուլի ռազմական օդանավակայանում հունվարի 1-ին տեղի ունեցած պայթյունի պատասխանատվությունը, հայտնում է Reuters-ը։

Ավելի վաղ Աֆղանստանի ներքին գործերի նախարարությունը հայտնել էր, որ պայթյունը տեղի է ունեցել կիրակի օրը՝ հունվարի 1-ին, Քաբուլի ռազմական օդանավակայանում։ Al Jazeera-ի հաղորդմամբ՝ միջադեպի հետևանքով՝ զոհեր և վիրավորներ կան, սակայն նրանց թիվը չի ճշտվել։

«Իսլամական պետությունը» ստանձնել է կիրակի օրը Քաբուլում թալիբների վրա հարձակման պատասխանատվությունը»,- գրում է Reuters-ը՝ վկայակոչելով ահաբեկչական խմբավորման Telegram ալիքը։

Դեկտեմբերի վերջին Աֆղանստանի նախկին նախագահ Համիդ Քարզայը հայտարարեց, որ ԱՄՆ-ն է մեղավոր երկրում տեղի ունեցածի համար։ Նրա խոսքով՝ Աֆղանստանի պատերազմն իրենց պատերազմը չէր։