Չինաստանում COVID-19-ից մահացությունների թիվը կտրուկ աճել է. Bloomberg

Չինաստանում դիակիզարանները ծանրաբեռնված են կորոնավիրուսից մահացությունների կտրուկ աճի պատճառով։ Այս մասին հայտնում է Bloomberg-ը։ Խոշոր քաղաքների սգո տները լեփ-լեցուն են, և որոշ փորձագետներ զգուշացնում են, որ վատագույնը դեռ առջևում է:

Պեկինի թաղամասերից մեկի տվյալներով՝ ամեն օր այրվում է մոտ 140-150 դի՝ նախկինում 40-ի փոխարեն։

Հոդվածագիրը պնդում է, որ դրա կապակցությամբ Չինաստանում իրենց մահացած հարազատներին ու ընկերներին դիակիզել ցանկացող քաղաքացիների մեծ հերթեր են կուտակվել։ Որոշ թաղման կազմակերպություններ անցել են առցանց հերթերի համակարգի:

Բրիտանական Airfinity Ltd. հետազոտական ​​ընկերության ներկայացուցիչների կարծիքով՝ մահերի թիվը կարող է օրական 9 հազարից հասնել 25 հազարի։ Միևնույն ժամանակ, Չինաստանի իշխանությունները չեն հրապարակել COVID-19-ից մահացածների վիճակագրությունը։