Թուրքիայի էներգետիկայի նախարարությունը գնահատել է «Սակարիայի» գազի պաշարները Սև ծովի թուրքական հատվածում

Սեւ ծովի թուրքական հատվածի «Սակարիա» գազահանքի բնական գազի ապացուցված պաշարները հասնում են 710 մլրդ խորանարդ մետրի, ինչը բավական է Թուրքիայի բնակչության պահանջմունքները 33 տարով բավարարելուն։ Այս մասին ասել է Թուրքիայի էներգետիկայի եւ բնական պաշարների նախարար Ֆաթիհ Դոնմեզը։

Նրա խոսքով՝ առաջադրված է չորս տարում Սեւ ծովում գազի արդյունահանման առավելագույն մակարդակի հասնելու նպատակ, ինչը թույլ կտա կրճատել կապույտ վառելիքի ներմուծումը 30 տոկոսով, տեղեկացրել է «Անադոլուն»։

«Ցամաքային հատվածում աշխատանքներին մասնակցում է մոտ 6 500 մարդ, իսկ ծովային հատվածում՝ եւս 2 500 մասնագետ։ Նախագծի իրականացման շրջանում 18 օտարերկրացի ինժեներներ ստացել են թուրքական քաղաքացիություն»,- նշել է Դոնմեզը։

Անդրադառնալով թուրքական BOTAŞ-ի կողմից ռուսական կողմին պարտքի վճարումն ուշացնելուն՝ Թուրքիայի էներգետիկայի նախարարն ասել է, որ բանակցություններն այդ հարցի շուրջ շարունակվում են։ «Ներկա պահին վճարումները հետաձգելու հարց չկա։ Մենք Ռուսաստանի հետ բանակցություններ ենք վարում բազմաթիվ ուղղություններով։ Կանգ կառնենք թուրքական կողմի համար առավել շահավետ տարբերակի վրա։ BOTAŞ-ն ուղիղ բանակցություններ է վարում «Գազպրոմի» հետ»,- նշել է նախարարը։