Պաշտոնյաների հակասական հայտարարությունները և քայլերը. Արարատ Գրիգորյան

Հակասական հայտարարություններով աչքի ընկնող պաշտոնյաների շարքում այսօր կանդրադառնանք Վայոց Ձորի մարզպետ Արարատ Գրիգորյանի գործունեությանը և այդ գործունեության ընթացքում արձանագրված տարատեսակ հակասական հայտարարություններին, որոնք որոշակի հարցեր են առաջացնում:

Դիցուք՝ ընդամենը մեկ ամիս առաջ Ազգային ժողովում լրագրողների հետ զրույցում Վայոց ձորի մարզպետ Արարատ Գրիգորյանը հայտարարել էր, որ իր տեղեկություններով, ադրբեջանական ստորաբաժանումները մնում են Ջերմուկի մատույցներում։ Այս հայտարարությունը նա արել էր այն բանից հետո, երբ ԳՇ պետը հայտարարել էր, որ որևէ լարվածություն մարզում,  մասնավորվապես՝ Ջերմուկում, չկա: Դրանից հետո Գրիգորյանը փոքր-ինչ փոխել էր խոսքերի տոնայնությունը: «Կարող է կրակոցներ լինեն, բայց մեր դիրքերի ուղղությամբ կամ այնպիսի իրավիճակ, որ լարվենք՝ չենք ունեցել այդպիսի դեպք։  Իրենք կարող է վերցնեն՝ օդ կրակեն, բայց այնպիսի լարված իրավիճակ չենք ունեցել Ջերմուկում, ինչը մեզ կստիպի լրացուցիչ միջոցներ ձեռնարկել», - ասԵլ էր մարզպետը։

Չնայած իր իսկ պնդումներին, որ մարզում առաջնային է լինելու բնապահպանության խնդիրներին լուծում տալը, բնության պահպանումը և բնակիչների առողջությունը՝ մարզպետը լծվել էր հանքաարդյունաբերողների լոբբինգին: Մասնավորապես, Վայոց ձորի մարզպետարանը դատի է տվել Ջերմուկի և Եղեգնաձորի ավագանիներին: Մարզպետարանը ՀՀ վարչական դատարանից պահանջում է անվավեր ճանաչել ավագանիների որոշումները՝ Ջերմուկը, Եղեգնաձոր համայնքները էկո-տնտեսական տարածք դարձնելու և համայնքներում մետաղական հանքարդյունաբերությունն արգելելու վերաբերյալ:  Մինչ այդ, Վայոց ձորի մարզպետարանը դատի էր տվել նաև իրենց համայնքները էկո-տնտեսական տարածք դարձնելու և համայնքում մետաղական հանքարդյունաբերությունը արգելող որոշումներ ընդունած Արենիի և Գլաձորի համայնքների ավագանիներին: Ի դեպ, դատարանը Գլաձորի ավագանու դեմ հայցը մերժել է: Ինչպես հասկանում ենք՝ Վայոց Ձորի մարզպետը որևէ ցանկություն չունի իր մարզը էկոլոգիապես մաքուր տեսնել և զբաղված է միայն հանքաարդյունաբերողների շահերի պաշտպանությամբ՝ դատի տալով սեփական մարզի համայնքներին:

Շարունակելի...