«Այս տարին Հայաստանի համար կլինի վերջին շանսը». Ալիևը կրկին սպառնացել է Հայաստանին

Ադրբեջանի նախագահ Իլհամ Ալիևը հայտարարել է, թե «ակնկալում էր Հայաստանի հետ խաղաղության պայմանագիր ստորագրել 2022 թվականին»։ Այս մասին հաղորդում է Interfax-ը։

«Ես անկեղծորեն հույս ունեի, որ մինչև տարեվերջ մենք կկարողանանք խաղաղության պայմանագիր կնքել, բայց դա տեղի չունեցավ։ Ինչի՞ է սպասում Հայաստանը։ Հավանաբար ինչ-որ աշխարհաքաղաքական փոփոխություններ, գուցե ինչ-որ մեկը նրան ինչ-որ բան է խոստացել»,- ասել է Ալիևը:

Անդրադառնալով խաղաղության պայմանագրի ստորագրման ժամկետներին՝ Ալիևը նշել է, որ խաղաղության պայմանագրի Ադրբեջանի առաջարկը «որոշ ժամանակ սեղանին կլինի»։

«Մենք սպասում ենք, որ Հայաստանը պաշտոնապես ճանաչի Ադրբեջանի տարածքային ամբողջականությունն ու ինքնիշխանությունը։ Այս տարին Հայաստանի համար կլինի վերջին շանսը: Հետո կլինի 2024 թվականը, ապա 2025-ին կավարտվի Ռուսաստանի խաղաղապահ առաքելությունը: Նրանք պետք է մի փոքր հեռու մտածեն»,- ասել է նա:

Ալիևը նաև զերծ չի մնացել Հայաստանին սպառնալուց․ «Հետագայում մենք ակտիվ չենք լինելու։ Նրանք սահմանազատում չեն ուզում, ինչը նշանակում է, որ սահմանն անցնելու է այնտեղով, որտեղով մենք հարմար կհամարենք։ Ես ստիպված եմ նման պայմանների դիմել։ Սահմանը սահմանազատված չէ, իսկ ո՞վ ասաց, որ այն անցնում է այնտեղով, ոչ այստեղով։ Ես կարծում եմ, որ դա այստեղ է անցնում, դրա համար պատճառներ ունեմ՝ պատմական և քարտեզագրական։ Ուստի դա ավելի շատ բխում է նրանց (Հայաստանի - խմբ․) շահերից, քան մեր շահերից»,- ասել է նա։