ԵՄ-ի բնակիչները նշել են՝ որն է իրենց հիմնական խնդիրը

Կյանքի թանկացումը այն գլխավոր խնդիրն է, որն անհանգստացնում է եվրոպացիների 93%-ին։ Այս մասին գրում է «ՌԻԱ Նովոստի» գործակալությունը՝ հղում անելով Եվրախորհրդարանի և Եվրոբարոմետր ծառայության պատվիրած ուսումնասիրությանը։ Գների բարձրացման վերաբերյալ ամենամեծ մտավախությունն են հայտնել Հունաստանի (հարցվածների 100%-ը), Կիպրոսի (99%), Իտալիայի և Պորտուգալիայի (յուրաքանչյուրը՝ 98%) քաղաքացիները։

Միևնույն ժամանակ, ԵՄ բնակիչների 82%-ն իրենց մտահոգությունն է անվանել աղքատության և սոցիալական մեկուսացման սպառնալիքը։ Եվրոպացիների 81%-ին անհանգստացնում է կլիմայի փոփոխությունը և երրորդ երկրների՝ Ուկրաինայում Ռուսաստանի հատուկ գործողության մեջ ներգրավվելու հավանականությունը:

Բացի այդ, եվրոպացիների 49%-ն արդեն հայտարարել է, որ իրենց կենսամակարդակն ընկել է։ Եվս 39%-ը կարծում է, որ դա կարող է տեղի ունենալ 2023 թվականին։

Ուստի, եվրոպացիները իշխանությունների կողմից սպասում են նոր միջոցների, որոնք կօգնեն կարգավորել իրավիճակը, ասվում է հետազոտության մեջ։

Ուսումնասիրությունն անցկացվել է 2022 թվականի հոկտեմբերի 12-ից նոյեմբերի 7-ը։