Արտոնություններ և գնումներ՝ առանց մրցույթի. Վահագն Արսենյանի ընտանեկան բիզնեսը ծաղկում է

Այն բանից հետո, ինչ Ջերմուկի համայնքապետի ԺՊ նշանակվեց, ապա ընտրվեց Վահագն Արսենյանը, վերջինիս ընտանեկան բիզնեսի գործերը գնալով ծաղկում են: Բանն այն է, որ պետական կառույցների մեծ մասը նախընտրում է ջուր գնել հենց Արսենյանի ընտանիքին պատկանող «Ջերմուկ գրուպ»-ից:

Բերենք մի քանի օրինակ: ՀՀ էկոնոմիկայի նախարարությունը նախորդ տարի «Ջերմուկ գրուպ»-ից 43,200 դրամի գնում է կատարել, ՀՀ դատախազությունը՝ 36,000 դրամի, Հակակոռուպցիոն կոմիտեն՝ 21,000 և 36,600, 41,100, 38,700, 38,700 և 239 հազար դրամի, ՀՀ արտաքին գործերի նախարարությունը ՝ 46,000 , 15,100 ,38,500 , 43,500 դրամի, առողջապահության նախարարությունը՝ 51,840 դրամի։

Բացի այս գնումներից, որոնք նախորդ տարի մեկ անձից կատարած գնումների ընդամենը մեկ տոկոսն են, կառավարությունը 3.8 միլիարդ դրամի ներդրման դիմաց 250 միլիոն դրամի մաքսային արտոնություն է տվել «Ջերմուկ գրուպ» ընկերությանը։

Ինչպես տեսնում ենք՝ պաշտոն ստանձնելուց և ՔՊ-ականների համար յուրային դառնալուց հետո Վահագն Արսենյանի գործերը լավացել են, իսկ թե ինչով է դա պայմանավորված՝ անշուշտ մեծ հարց է՝ հաշվի առնելով այն հանգամանքը, որ Նոր Հայաստանում տիրող բարքերը քիչ բանով են տարբերվում Հին Հայաստանում տիրող բարքերից...