Աղքատ համայնքների՝ ճոխ ծախսերը տարեմուտին

Հայաստանի մի շարք համայնքների ղեկավարներ անցած Ամանորը բավական բուռն են դիմավորել: Չնայած համայնքում առկա կուտակված բազմաթիվ խնդիրները՝  համայնքապետերը որոշել են որ առաջնային պետք է զբաղվեն համայնքի տոնական զարդարանքով և լուսավորությամբ: Ավելորդ է ասել, որ այդ նպատակով բյուջեից՝ այսինքն հարկատուների գրպանից հարյուր հազարավոր դրամներ են մսխվել:

Դիցուք՝ Մեղրիի մարզամշակութային կենտրոն» ՀՈԱԿ-ի, Մեղրի եւ Ագարակ քաղաքների մշակույթի տանը կազմակերպված միջոցառումների, ինչպես նաեւ տոնական զարդերի ծախսերի համար տրամադրվել է 441.200 դրամ։ Մեղրի եւ Ագարակ քաղաքների կենտրոնական հրապարակ տանող փողոցների եւ հրապարակների տոնական ձեւավորման համար հատկացվել է 1 մլն 417 հազար 200 դրամ, որից 169 հազար դրամը ծախսվել է մեկ հատ արհեստական տոնածառ ձեռք բերելու համար, իսկ 1 մլն 248 հազար դրամը ծախսվել է լուսային զարդարանքների եւ տոնածառի խաղալիքների համար։

ՀՀ Շիրակի մարզի Արթիկ համայնքում շուրջ 900000 ՀՀ դրամ է ծախսվել՝ Արթիկ համայնքի կարիքների համար ամանորյա միջոցառման համար հյուրասիրության ծառայություններ ձեռք բերելու նպատակով:

Իջևանի համայնքապետարանն էլ նոր տարվա շեմին զբաղված էր ոչ ավել, ոչ պակաս՝ գրենական պիտույքների պարկը թարմացնելով: Գնումների պայմանագրին կարելի է ծանոթանալ այստեղ:

Թվում էր, թե հաշվի առնելով երկրում ստեղծված սոցիալ-տնտեսական վիճակը, այն, որ համայնքները եկամուտներ հավաքագրելու հետ կապված խնդիրների են բախվում, կարելի էր ենթադրել, որ վերջիններս ավելի խնայողաբար կմոտենան հարկատուների վճարած հարկերին, սակայն, ավաղ, Նոր Հայաստանում տիրում են Հին Հայաստանի բարքերը...