Պաշտոնյաների պարզամիտ «կռուտիտները». Ռոմանոս Պետրոսյան

Շարունակելով հանրության դատին ներկայացնել այն պաշտոնյաներին, ովքեր աչքի են ընկել հակասական հայտարարություններով, քայլերով և այնուհետև ստիպված են եղել խմբագրել իրենց իսկ խոսքերը ու գործերը՝ այսօր կանդրադառնանք Կոտայքի նախկին մարզպետ, շրջակա միջավայրի նախկին նախարար, ՊՎԾ գործող պետ Ռոմանոս Պետրոսյանին:

 Լրատվական դաշտում կան բազմաթիվ նյութեր Կոտայքի մարզպետի պաշտոնը զբաղեցնելու ընթացքում՝ գյուղապետերի նկատմամբ իրականացրած ահաբեկիչ քայլերի վերաբերյալ, սակայն  Ռոմանոս Պետրոսյանը հերքում է այդ լուրերը, հերքում է, որ համայնքապետերին «չորով» հրահանգել է հրաժարվել պաշտոններից և չենթարկվողներին ու բարձրաձայնողներին դատախազության միջոցով բանտ նստեցնելու սպառնալիքներ է հնչեցրել։ Ռոմանոս Պետրոսյանի խոսքով՝ համայնքապետերի հետ հանդիպումների ժամանակ ինքը բարիդրացիական զրույցներ էր ունենում համայնքապետերի հետ և նրանցից շատերը հենց իրենց կամքով էին հրաժարական տալիս։

Ռոմանոս Պետրոսյանը հայտնի է նաև իր ընդունած որոշումներով, որոնց սխալ լինելը արդյունքում ոչ միայն ինքն է ընդունել, այլ նաև դատարանը: Դիցուք՝ Վերաքննիչ դատարանը, Նարինե Բարսեղյանի նախագահությամբ,  մերժել է Պետական վերահսկողական ծառայության ղեկավարի պաշտոնը զբաղեցնող Ռոմանոս Պետրոսյանի բողոքը։ Վերջինս բողոքարկել էր առաջին ատյանի դատարանի վճիռը, որով ՇՄՆ «Արգելոցապարկային համալիր» ՊՈԱԿ-ի՝ աշխատանքից հեռացված տնօրեն Լևոն Գաբրիելյանը վերականգնվելու էր պաշտոնում, ստանալու էր միջին աշխատավարձը ողջ պարապուրդի ժամանակահատվածի համար։

Մյուս դրվագը, ինչպես գիտենք, Պետրոսյանը զբաղեցնելով շրջակա միջավայրի նախարարի պաշտոնը՝ հայտարարում էր, որ աննահանջ պայքար է մղելու անտառահատումների դեմ: Լոռու մարզի դատախազությունը վերջին ամիսներին ուսումնասիրությունն է իրականացրել հատկապես Հայանտառ ՊՈԱԿ-ում և խախտումներ է հայտնաբերել: Ուշագրավն այն է, որ ՊՈԱԿ-ի տնօրենի պաշտոնակատարը այդ ընթացքում Պավել Ցուգունյանն էր՝ ըստ մամուլի տեղեկությունների ՊՎԾ պետ Ռոմանոս Պետրոսյանի ազգականը, ավելի հստակ՝ նրա կնոջ քեռորդին: Հենց Պետրոսյանի քավորությամբ էր ՔՊ-ն ցանկանում Ցուգունյանին դարձնել Աբովյանի քաղաքապետ, սակայն չստացվեց, արդյունքում` նրան նշանակեցին Հայանտառ ՊՈԱԿ-ի տնօրենի ԺՊ: Եվ եթե այն ժամանակ մամուլը գրում էր, որ Ռոմանոս Պետրոսյանը հերթական ազգականին է աշխատանքի դասավորել, այսօր ստացվում է, որ Պետրոսյանը, լինելով ՊՎԾ պետ, աչք է փակում իր ազգականի հիմնարկում տեղի ունեցող ապօրինությունների վրա: 

Նույն Ռոմանոս Պետրոսյանը խոստանում էր հպարտ քաղաքացիներին մաքրել Սևանի հանրային ափերը ապօրինի կառույցներից, այդ թվում՝ օլիգարխների օբյեկտներից: Մինչ այս պահը հայտնի չէ, թե քանի օլիգարխի օբյեկտ ի վերջո քանդվեց այդ որոշման արդյունքում:

Շարունակելի...