Պաշտոնյաների հակասական քայլերն ու հայտարարությունները. Նազելի Բաղդասարյան

Շարունակում ենք հանրության ուշադրությանը ներկայացնել այն պաշտոնյաներին, ովքեր աչքի են ընկել հակասական քայլերով, հայտարարություններով: Այս շարքում առանձնահատուկ տեղ է զբաղեցնում Շիրակի մարզպետ Նազելի Բաղդասարյանը: 

Դեռևս վերջինիս պատգամավոր եղած ժամանակ, Փաշինյանի՝ Գյումրի այցից և երկրաշարժի զոհերի հիշատակը հարյուրավոր թիկնապահներով հարգելուց հետո, Բաղդասարյանը մի գրառում էր արել, որը կցիտենք ստորև․

«Այսօր, երբ ոմանք ԱԺ ամբիոնից քննարկում էին վարչապետի պաշտոնավարման հարցը, վարչապետը նաև իրենց անունից էր ծաղիկներ խոնարհում Գյումրիում, Սպիտակում, Վանաձորում։ Թեև հարգանքն ու ապրումակցումը քաղաքական կատեգորիա չէ, բայց հարգե՛ք մեր սուգն ու վիշտը»,- իր ֆեսբուքյան էջում գրել էր Նազելի Բաղդասարյանը:

Ուշագրավն այստեղ մի մեկնաբանություն է, որում հիշյալ պատգամավորը գերազանցում է երևի թե նույնիսկ ինքն իրեն:

Օգտատերերից մեկի դիտարկմանը, թե վարչապետն ուղղակի իր պարտականությունն է կատարել՝ պետք չէ հերոսացնել, Նազելի Բաղդասարյանը պատասխանում է. «Նախկին ղեկավարներն էլ թող ամեն տարի նույն պրիմիտիվությամբ այցելեին Գյումրի։ Ես, որ չեմ հիշում, իսկ Դո՞ւք»:

Նազելի Բաղդասարյանը, փաստորեն, չի հիշում դեպք, երբ երկրի նախկին ղեկավարները երկրաշարժի օրն այցելել են Գյումրի՝ մասնավորապես, և աղետի գոտի` առհասարակ: 

2021-ի Ապրիլի 8-ի 21։33-ին ԱԺ «Իմ քայլը» խմբակցության պատգամավոր Նազելի Բաղդասարյանը ոգեւորությամբ հայտարարեց, թե մի քանի ժամից հայ գերիները վերադառնալու են: 

Ինքնաթիռի վայրէջքից հետո, երբ մարդիկ հասկացան, որ գերիները չեն վերադարձել, Տիգրան Ավինյանի գրասենյակը հայտարարություն տարածեց, թե Ադրբեջանը փոշմանել է։ Արդեն ապրիլի 9-ին Ռուստամ Մուրադովի խոսքից պարզ դարձավ, որ Ադրբեջանը չէր էլ համաձայնել, որպեսզի հետո փոշմաներ․ «Պրովոկացիա էր, թյուրիմացության մեջ են գցում բնակչությանը։ Գերիների վերադարձ պլանավորված չի եղել, դա սովորական աշխատանքային այց էր»,- ասել էր Մուրադովը։ Ստացվում է, Բաղդասարյանը ընդամենը աչոկներ կամ քաղաքական դիվիդենտներ հավաքելու համա՞ր էր պոպուլիստական հայտարարություններ անում անչափ զգայուն մի թեմայով...

Հաջորդ սկանդալային և հակասական իրավիճակը ի հայտ եկավ այն բանից հետո, երբ Գյումրու ավագանու «Քաղաքացիական պայմանագիր» խմբակցության  Նազելի Բաղդասարյանի եղբայր Արման Բաղդասարյանը վայր դրեց մանդատը: Այս ամենը ուղեկցվեց սկանդալով, որ վերջինիս կնոջը, այսինքն՝ իր հարսին, Բաղդասարյանը ապօրինի էր նշանակել մարզպետարանում աշխատանքի: Թեման ջրելու նպատակով հրաժարական տվեցին թե՛ Արման Բաղդասարյանը, թե՛ իր կինը...

Շարունակելի...