Գյումրիի համար պայքարը թեժանում է. ՔՊ-ականները փնտրտուքի մեջ են

Գյումրի քաղաքի փոխքաղաքապետԴավիթ Առուշանյանի` ԱԺ ՔՊ-ական պատգամավոր դառնալուց հետո թափուր մնացած նրա պաշտոնը օրերս կհամալրվի։ Լրատվամիջոցների տեղեկություններով` այդ պաշտոնում կնշանակվի Գյումրու ավագանու «Քաղաքացիական պայմանագիր» խմբակցության ավագանու անդամ Վահագն Մկրտչյանը։ Վերջինս 28 տարեկան է, ավարտել է Բժշկական համալսարանը։ Մասնագիտությամբ ատամնաբույժ է։ Բայց նրա գլխավոր «արժանիքը», որի համար Վահագն Մկրտչյանը կդառնա Գյումրու փոխքաղաքապետ, այն է, որ վերջինս Նիկոլ Փաշինյանի կնոջ` Աննա Հակոբյանի հարազատ մորաքրոջ թոռն է։

Սակայն, թեկնածուները այսքանով չեն սահմանափակվում: Տվյալ պաշտոնին նշանակվելու շանսեր ունի նաև Երևանի նախկին փոխքաղաքապետ, Գյումրու դրամատիկական թատրոնի նախկին տնօրեն Տիգրան Վիրաբյանի թեկնածությունը: Տիգրան Վիրաբյանի մասին՝ որպես Գյումրիի քաղաքապետի՝ իշխանությունների նախընտրած թեկնածուի, խոսում էին դեռևս մեկ տարի առաջ, երբ խոսք էր գնում այն մասին, որ գործող քաղաքապետ Սամվել Բալասանյանը վայր է դնելու իր լիազորությունները:

Քաղաքապետի տեղակալի պաշտոնին դեռևս նախորդ ՏԻՄ ընտրություններին հավակնում էր նաև Գյումրու «Ինֆեկցիոն» հիվանդանոցի տնօրեն Աստղիկ Բեյբությանը։ Այս հարցում էլ շահագրգիռ է արդեն նախկին մարզպետ Հովհաննես Հարությունյանը։ 

Ի դեպ, չի բացառվում, որ այս երկու թեկնածուներից և ոչ մեկն էլ արդյունքում չարժանանա բաղձալի պաշտոնին, քանի որ հավակնորդների թիվը կարող է շատ ավելի մեծ լինել, քան կարող է թվալ առաջին հայացքից: Չի բացառվում, որ իր յուրային թեկնածուին առաջ մղելու ցանկություն ունենա նաև Շիրակի նախկին մարզպետ Կարեն Սարուխանյանը, ով ակնհայտ կերպով չի կտրվում մարզում տեղի ունեցող անցուդարձից:

ՔՊ-ականների միջև այս պաշտոնակռվի արդյունքում տուժում է Գյումրին և գյումրեցին, այն գյումրեցին, որին սիրո խոստովանություններ էին շռայլում գործող իշխանության ներկայացուցիչները, սակայն, ինչպես տեսնում ենք, աթոռակռիվն այս պահին քաղաքի շահերից վեր է: