Նիդեռլանդների ԱԳ նախարարը «Ուկրաինայում հակամարտությունը դադարեցնելու միջոց» է հայտնել

«Ռուսաստանի հետ հակամարտությունը դադարեցնելու Ուկրաինայի միակ ճանապարհը նրան մարտի դաշտում հաղթելն է»: Այս մասին հայտարարել է Նիդեռլանդների արտաքին գործերի նախարար Վոպկե Հոկստրան, գրում է Gazeta-ն։

«Բացարձակապես պարզ է, որ, անկախ ամեն ինչից՝ այս հակամարտությունը իսկապես լուծելու միակ ճանապարհը մարտի դաշտում հաղթելն է։ Ուստի Ուկրաինային ավելի շատ զենք է պետք, մենք պետք է առերեսվենք ճշմարտության հետ։ Եթե ​​սահմանափակենք մեր ջանքերը, ապա այն ամենը, ինչ արել ենք մինչ այս պահը, կզրոյացվի»,- ասել է Նիդեռլանդների ներկայացուցիչը։

Նա հիշեցրել է, որ Ուկրաինայում հակամարտությունը հանգեցրել է «էներգետիկ ճգնաժամի, արագացված կլիմայի փոփոխության և ժողովրդավարության էրոզիայի»։

«Ես խորապես հավատում եմ, որ միավորելով ուժերը՝ մենք կարող ենք կարևոր դեր խաղալ այսօրվա մարտահրավերներին դիմակայելու գործում», - ասել է Հոկստրան:

Ավելի վաղ Նիդեռլանդների վարչապետ Մարկ Ռյուտեն Ուկրաինայի նախագահ Վոլոդիմիր Զելենսկու հետ հեռախոսազրույցից հետո հայտարարել էր, որ ուկրաինական հակամարտության առաջիկա ամիսները կդառնան կրիտիկական։