Գրետա Թունբերգը ձերբակալվել է Գերմանիայում ցույցերի ժամանակ․ Reuters

Շվեդ բնապահպան ակտիվիստ Գրետա Թունբերգը ձերբակալվել է Գերմանիայի արևմուտքում գտնվող Լյուցերաթ լքված բնակավայրի մոտ բողոքի ցույցերի ժամանակ։ Այս մասին երեքշաբթի հայտնել է Reuters գործակալությունը՝ վկայակոչելով ոստիկանությանը։

Գործակալության տվյալներով՝ Թունբերգը եղել է բնակավայրի մոտակայքում գտնվող ածխահանքի մոտ բողոքի ցույցերի ժամանակ ձերբակալված ակտիվիստների թվում։

Հունվարի 11-ից ցույցեր են տեղի ունենում Լյուցերաթի մոտ։ Այս բնակավայրը վարչականորեն պատկանում է 43 հազար բնակիչ ունեցող Էրկելենց քաղաքին, սակայն գտնվում է նրանից մի քանի կիլոմետր հեռավորության վրա։ Տեղի բոլոր բնակիչները վերաբնակեցվել են 2006 թվականին, քանի որ շենքերի տեղում շուտով պետք է հայտնվի ածխի նոր հանք։