«Չորրորդ ինքնիշխանություն». Սերժ Սարգսյանին, ինչպես միշտ, չի հաջողվել պարզել իրականությունը

Թերթը գրում է. «ՀՀ Ազգային ժողովը, մասնավորապես պատգամավորական կորպուսը, շարունակում է դեռևս քննարկել ՀՀ վարչապետ Տիգրան Սարգսյանի վարքը Թաթայի համերգի ժամանակ: Պատգամավորներին ևս զվարճացրել է ավելի շատ վարչապետի հերքող այն հայտարարությունը, թե իբր ինքը ոչ թե գինովցած է եղել, այլ պարզապես տեսագրումն է ձայնային խոտանով իրականացվել:

Երեկ այս թեմայով ԱԺ-ում բավականին ուշագրավ զրույց տեղի ունեցավ ՀՀԿ-ական երկու պատգամավորների միջև: Նրանցից մեկը մյուսին ասում էր՝ «բա որ հանկարծ մի լրագրող ֆայմի ու հարցնի՝ ասենք վարչապետի հարբած ելույթը ասում եք, թե ձայնային խոտան էր, իսկ ինչի՞ խոտան էր, որ Տիգրան Սարգսյանը հազիվ էր կանգնում ոտքի վրա, անկապ ծիծաղում էր ու տեղում ճոճվում»: Մյուսի պատասխանն այսպիսին էր. «Դե որ ֆայմեին՝ մինչև հիմա հարցրած կլինեին: Որ չեն հարցրել, ուրեմն էլ չեն ֆայմի»:

Ի դեպ, «ՉԻ» ունեցած տեղեկություններով՝ Սերժ Սարգսյանը նույն օրը Մարզահամերգային համալիրում Թաթայի համերգին ներկա հանրապետականներից փորձել է պարզել ճշմարտությունը, սակայն ՀՀ վարչապետն անձամբ է խնդրել այդ օրն իր «գաստրոլին» ներկա հանրապետականներին Սարգսյանի մոտ ամեն ինչ հերքել, ապա խոստացել է պատգամավորներին, որ անպայման իրենց լավության տակից դուրս կգա:

Երեկ խորհրդարանում ԱԺ-կառավարություն ճեպազրույցի ժամանակ ՀՀ վարչապետ Տիգրան Սարգսյանը վերստին անդրադարձել է իր՝ Թաթայի համերգին հնչեցրած ելույթին: «Անկեղծ ասած, իմ պապս ինձ խորհուրդ էր տալիս, որ իմ կյանքում ընկերություն չանեմ էն մարդկանց հետ, որոնք չեն խմում: Ընդհանրապես, խմիչքին նորմալ եմ վերաբերվում: Երկրորդը, այդ միջոցառման ժամանակ իսկապես տեխնիկական խնդիր առաջացավ, և մեր թիմը, որը նախապատրաստել էր այդ միջոցառումը, այդ հանգամանքը հաշվի չէր առել, որ կարող է այդպիսի տեխնիկական խոտան ի հայտ գա, որովհետև բեմը գտնվում էր ուղղակի մեր տրիբունայի դեմ-դիմաց, և բոլոր սարքավորումները և բարձրախոսները հեռու էին գտնվում: Եվ երբ որ ես սկսեցի խոսել, ապա արձագանքը այնքան ուժեղ էր և հարվածում էր ինձ, որ ես ուղղակի չէի կարողանում լսել, թե ես ինչ նախադասություն եմ արտասանում: Եվ եթե նախատեսել էին ինձ համար ելույթ, ապա ճիշտ կլիներ, որ ես նույնպես ամբիոնից ելույթ ունենայի: Այդ դեպքում այդ խոտանը չէր լինի»,- ասել է վարչապետը՝ մեղադրելով իր թիմակիցներին, որ նրանք հաշվի չեն առել դահլիճի առանձնահատկությունը:

«Համենայնդեպս, իմ քաղաքական հրապարակային ելույթների փորձառությունը 22 տարվա էսպիսի միջադեպ չէր եղել դեռևս: Սա էլ մի դաս էր, որ հաշվի կառնենք: Մյուս կողմից էլ, անկեղծ ասած, մի քիչ ինձ համար անհասկանալի էր էն աժիոտաժը, որը առաջացել էր, որովհետև հազարավոր մարդիկ էին մասնակցում այդ միջոցառմանը: Հարյուրավոր վկաներ կային: Եթե խմած վիճակում լինեի՝ բոլորը դա կտեսնեին: Եվ թաքցնելու բան էլ չկա: բայց եթե հիմա բոլորը ասում են՝ դե հիմա ինչ է եղել, խմել ա, թող ասի՝ խմել եմ, բա հիմա էն մարդիկ, որոնք իմ հետ էին և տեսնում էին, որ ես խմած չէի, չէի՞ն ասի՝ վարչապետը սուտ ա խոսում»:

Լրագրողներից և որևէ մեկը ավաղ չի հարցրել, թե ինչից էին փակվում այդ օրը վարչապետի աչքերը: Չնայած հիմա էլ ասելու էր, որ դահլիճի լուսավորությունն է եղել: Ինչևէ»: