ԵՄ-ում կստեղծվի կոալիցիա՝ Գերմանիայի վրա ճնշում գործադրելու համար. Politico

Եվրամիության մի քանի երկրներ աշխատում են կոալիցիա ստեղծելու ուղղությամբ՝ ճնշում գործադրելու Գերմանիայի վրա՝ Ուկրաինային Leopard տանկեր հանձնելու համար։ Այս մասին հայտնում է Politico թերթը։

Նշվում է, որ ԵՄ-ում հիասթափությունն աճում է այն պատճառով, որ Գերմանիան պնդում է, որ ԱՄՆ-ն առաջին քայլը կատարի ուկրաինական բանակին տանկեր մատակարարելու հարցում։

Politico-ի փոխանցմամբ՝ եվրոպական մի խումբ երկրներ կարող են առաջին քայլերն անել հունվարի 20-ին Գերմանիայի Ռամշտեյն ավիաբազայում Ուկրաինային աջակցող կոնտակտային խմբի հանդիպմանը։

Պարբերականը այս քայլը որակել է որպես ԱՄՆ-ի և նրա դաշնակիցների նոր բազմակողմ արշավի մի մաս՝ համոզելու գերմանական իշխանություններին փոխել իրենց կարծիքը տանկերի հարցում:

Ակնկալվում է, որ երկրների խումբը կստանա լայն աջակցություն։ Գերմանական ծագման Leopard տանկեր ունեցող 12 երկրներից երկուսի պաշտպանության նախարարությունների ներկայացուցիչները Politico-ին ասել են, որ իրենց կառավարությունները պատրաստ են ընդունել նման պայմաններ։