Նախկիններ vs հեղափոխական թիմակիցներ. ո՞վ կդառնա Փաշինյանի նոր «մարզպետացուն»

Տևական ժամանակ է՝ Շիրակի մարզում ակտիվ խոսակցություններ են շրջանառվում Շիրակի մարզպետ Նազելի Բաղդասարյանի պաշտոնափոխ լինելու մասին։ Ըստ տեղեկությունների, նա տեղափոխվելու է կառավարություն՝ զբաղեցնելով ՀՀ արդարադատության փոխնախարարի պաշտոնը։ Մարզպետն, ըստ էության, ոչ հերքել, ոչ էլ հաստատել էր այս լուրերը։  Նազելի Բաղդասարյանը՝ որպես մարզպետ, դեռ ակտիվ, բնականոն աշխատանքի մեջ է, պատրաստվում է ՀՀ կառավարության որոշմամբ մարզպետարանում առաջիկայում իրականացվող կառուցվածքային փոփոխություններին։ Իսկ այս ընթացքում տարբեր անուններ են շրջանառվում, թե ովքեր կարող են փոխարինել Բաղդասարյանին այս պաշտոնում: 

Նրանցից մեկը Շիրակի փոխմարզպետ, Առափի համայնքի երկարամյա ղեկավար Ալբերտ Այվազյանն է: Նա դեկտեմբերի 5-ին  ՔՊ-ի կողմից մասնակցում էր Ախուրյան խոշորացված համայնքի ՏԻՄ ընտրություններին, իշխող ուժի համայնքապետի թեկնածուն էր։ Ալբերտ Այվազյանը ընդամենը մեկ ձայնով հետ մնաց «Ախուրյան» և «Հաղթանակ» կուսակցությունների դաշինքի դաշնակցական թեկնածու Արծրուն Իգիթյանից։  Վերջինս ստացավ 14 ձայն, Ալբերտ Այվազյանը՝ 13։  Նրա անունը շաղկապվում էր «Մի LEXUS-ի պատմության» հետ  երբ վերջինս Ախուրյանի համայնքապետարանին պատկանող Lexus մակնիշի ավտոմեքենան պահանջել և ավագանու հաստատմամբ ստացել էր որպես ՔՊ խմբակցության սպասարկող մեքենա, բայց օգտագործում է սեփական կարիքների համար։ Ի դեպ, Այվազյանը սկզբից պնդում էր, որ ամեն ինչ օրինական է, բայց մարզպետի պարտականությունները կատարելու ժամանակ իր ձեռամբ ստորագրում է հանձնարարական` ավագանու որոշումը համապատասխանեցնել ՀՀ օրենսդրությանը և արդյունքի մասին տեղեկություն փոխանցել Շիրակի մարզպետարան։ Ըստ էության, Այվազյանը 31 տարի ղեկավարել է համայնքը, փայլուն լեզու է գտել նախկին իշխանությունների հետ և դասական նախկին է՝ հեղափոխականների պատկերացմամբ:

Մարզպետի մյուս թեկնածուն՝ գաղափարական ՔՊ-ական, նախկին փոխվարչապետ Համբարձում Մաթևոսյանն է: Չնայած նրան, որ վերջինս փաստացի լքեց պաշտոնը ՔՊ վարչության ընտրությունների արդյունքում գրանցված խախտումներից հետո, նա շարունակում է մնալ Փաշինյանի մտերիմ շրջանակներում և անվստահության քվե հարազատ կուսակցությունում վերջինիս դեռ չեն հայտնել: 

Ըստ էության, Փաշինյանի առջև բավական հետաքրքիր ընտրություն է կանգնած՝ մարզպետ նշանակել նախկին Այվազյանին, թե գաղափարական ՔՊ-ական, իր թիմակից Մաթևոսյանին: Փաշինյանի վերջին նշանակումները խոսում են այն մասին, որ նա սկսել է ավելի քիչ վստահել ՔՊ-ականներին: Դա է պատճառը, որ որ ՀՀ փոխվարչապետը նշանակվեց Տիգրան Խաչատրանը, որը ՔՊ-ից չէր, ինչպես նաեւ Արդարադատության նախարար Գրիգոր Մինասյանը, ում նշանակումը ՔՊ ներսում բավական մեծ ռեզոնանս առաջացրեց: Այժմ էլ Փաշինյանը պետք  է որոշի՝ ում է ավելի շատ վստահում՝ նախկիններին, թե իր հետ քայլած և իր հետ հեղափոխություն արած թիմակիցներին...