Էրդողանը կարող է կորցնել նախագահի պաշտոնն արդար ընտրությունների արդյունքում․ ԶԼՄ

Թուրքիայի առաջնորդ Ռեջեփ Թայիփ Էրդողանը կարող է կորցնել իր պաշտոնը, եթե հաջորդ նախագահական ընտրություններն արդար լինեն։ Այս մասին հայտնում է բրիտանական The Economist թերթը։

Հրատարակությունը հիշեցնում է, որ Էրդողանի գլխավորած «Արդարություն և զարգացում» կուսակցությունը արագորեն կորցնում է իր նախկին ժողովրդականությունը. օրինակ, երեք տարի առաջ ԱԶԿ-ն պարտվել էր Անկարայի, Ստամբուլի և Իզմիրի քաղաքապետի ընտրություններում՝ Թուրքիայի երեք խոշորագույն քաղաքներում։

«Հարցումները ցույց են տալիս, որ Էրդողանը կարող է կորցնել նախագահի պաշտոնը չորս ամսից, եթե ընդդիմությունը համախմբվի իր ամենահայտնի թեկնածուի շուրջ, և ընտրությունները քիչ թե շատ արդար անցնեն»,- գրում է նյութի հեղինակը։

Նշվում է, որ Թուրքիայի ներկայիս նախագահի վարկանիշի անկումը պայմանավորված է նրա երկարատև կառավարման ընթացքում ժողովրդավարական ինստիտուտների դեգրադացմամբ, ինչպես նաև աննախադեպ գնաճով և կենսամակարդակի անկմամբ։

«Էրդողանը կարծում է, որ գնաճի դեմ դեղամիջոցը փողը էժանացնելն է։ Սա է հիմնական պատճառը, որ Թուրքիայում գնաճը կազմում է 64 տոկոս»,- նշում է թերթը։