Աբրամովիչը 2,3 միլիարդ ֆունտ կփոխանցի Ուկրաինային․ The Telegraph

Ռուս միլիարդատեր Ռոման Աբրամովիչը «Չելսի» ֆուտբոլային ակումբի վաճառքից ստացված հասույթից 2,3 միլիարդ ֆունտ (2,8 միլիարդ դոլար) կփոխանցի Ուկրաինային։ Այս մասին հայտնում է The Telegraph-ը։

2022 թվականի մարտի 2-ին Աբրամովիչը հայտարարեց, որ անգլիական ակումբի վաճառքից ստացված հասույթը կամովին կփոխանցի հատուկ հիմնադրամ՝ օգնելու Ուկրաինայում զոհերի ընտանիքներին և տուժածներին։

Միլիարդատերը նշել է, որ խոսքը ոչ միայն ռազմական գործողություններից տուժածներին ուղղակի ֆինանսական օգնության մասին է, այլ նաև ավերված ենթակառուցվածքների վերականգնման գործընթացին ֆինանսական աջակցության մասին։ Օլիգարխի ներկայացուցիչն իր հերթին RBC-ին բացատրել է, որ «խոսքը բոլոր կողմերից հակամարտությունից տուժածների մասին է՝ ռուսների, ուկրաինացիների, ԿԺՀ-ի և ԼԺՀ-ի բնակիչների»։

Աբրամովիչը «Չելսին» ձեռք էր բերել 2003 թվականին 140 միլիոն ֆունտով: Այդ ժամանակից ի վեր լոնդոնյան ակումբը հինգ անգամ հաղթել է Պրեմիեր լիգան, երկու անգամ հաղթել Չեմպիոնների լիգան և Եվրոպայի լիգան, հինգ անգամ հաղթել Անգլիայի գավաթը և երեք անգամ՝ Անգլիայի լիգայի գավաթը: