Ինչ ունեցվածք են հայտարարագրել ԱԳՆ նախարարն ու փոխնախարարները

Շարունակում ենք ներկայացնել բարձրաստիճան հայ պաշտոնյաների կողմից ներկայացված գույքի և եկամուտների հայտարարագրերը: Այսօր կանդրադառնանք ԱԳՆ ղեկավար կազմին:

Ըստ 2021 թվականի տարեկան հայտարարագրի՝ ԱԳՆ նախարար Արարատ Միրզոյանը վաճառել է Շենգավիթում ունեցած իր բնակարանը՝ 34 մլն 790 հազար դրամով: Բանկային ավանդը կազմել է 70 հազար դոլար: Իսկ բանկային հաշիվներին ունեցած գումարը կազմել է 9 մլն 100 հազար դրամ, 70 հազար 188 դոլար: Կանխիկ գումարը մեկ տարվա ընթացքում ավելացել է՝ 5 մլն 800 հազար դրամից դառնալով 8 մլն դրամ: 2021 թվականին նա ընդհանուր ստացել է 17 մլն 788 հազար դրամի չափով աշխատավարձ, աշխատավարձի մի հատվածը խորհրդարանից, մյուս մասը՝ Արտաքին գործերի նախարարությունից: Ի դեպ, նախորդ տարվա դեկտեմբերի 31-ի դրությամբ Արարատ Միրզոյանի ունեցած վարկերի եւ փոխառությունների մնացորդը կազմել է 31 մլն 311 հազար դրամ: Տեղեկացնենք, որ Միրզոյանը ներկայացրել է նաեւ ծախսերի հայտարարագիր, որտեղ նշված է, որ 4 մլն 800 հազար դրամ վարկ է մարել: Միրզոյանի կնոջ՝ Գոհար Աբաջյանի հայտարարագրում նշված է, որ մեկ բնակարանի համատեղ սեփականատեր է: Խոսքը Աջափնյակ վարչական շրջանում գտնվող բնակարանի մասին է, որն ամուսինները ձեռք են բերել 2018 թվականին: Նախարարի կինը 2019 թվականին 6 մլն 200 հազար դրամով գնել է 2011 թվականի արտադրության Kia մակնիշի ավտոմեքենա: Բանկային հաշվին առկա է եղել 571 հազար դրամ եւ 1995 դոլար: Պաշտոնյայի տիկնոջ կանխիկ գումարը եւս մեկ տարվա ընթացքում ավելացել է՝ 290 հազար դրամից դառնալով 1.5 մլն դրամ: Գոհար Աբաջյանը երկու վայրից աշխատավարձ է ստացել. «ՎՕԼՕ» ընկերությունից ստացել է 11 մլն 744 հազար դրամ, իսկ 360 հազար դրամ էլ ստացել է ՝ «Քուիք Ստարտ»-ից: Գոհար Աբաջյանի վարկի մայր գումարի մնացորդը կազմել է ընդհանուր 2 մլն 366 հազար դրամ:

Նախարարի տեղակալ Պարույր Հովհաննիսյանը հայտարարագրել է երկու բնակարան՝ մեկը գնված, իսկ մյուսը՝ ժառանգություն ստացված: Պաշտոնյայի բանկային հաշվի մնացորդը կազմել է 20,245.65 եվրո: Հաշվետու տարվա եկամուտները 2,000,060.00 դրամ:

Փոխնախարար Մնացական Սաֆարյանը հայտարարագրել է բնակարան, VOLKSWAGEN մակնիշի ավտոմեքենա,  բանկային հաշվի մնացորդները կազմել են 3,900.00 եվրո, 277,000.00 դրամ, 2,000,000.00 դրամ, 5,000.00 դրամ: Կանխիկ դրամը՝  3,000.00 ԱՄՆ դոլար: Հաշվետու տարում պաշտոնյայի եկամուտները կազմել են 682,375.00 դրամ:

Վահան Կոստանյանը հայտարարագրել է TOYOTA մակնիշի ավտոմեքենա, 400,000.00 դրամի փոխառություն, բանկային հաշվի մնացորդները կազմել են 476,000.00 դրամ և 30.00 եվրո: Պաշտոնյան հայտարարագրել է նաև 200,000.00  դրամի կանխիկ գումար: Հաշվետու տարվա եկամուտները կազմել են 8,838,126.00 դրամ:

Վահե Գևորգյանը հայտարարագրել է բնակարան և հողամաս,  AUDI մակնիշի ավտոմեքենա, 6,000.00 եվրոյի բանկային ավանդ,  բանկային հաշիվների մնացորդը կազմել է 7,922,000.00 դրամ և 12,505.00 եվրո: Հաշվետու տարվա եկամուտները կազմել են 9,661,809.00 դրամ: