ՌԴ ԱԳՆ-ն նոտա է փոխանցել ԱՄՆ դեսպանատանը՝ պահանջելով դադարեցնել միջամտությունը Ռուսաստանի ներքին գործերին

ՌԴ ԱԳՆ-ն նոտա է փոխանցել ԱՄՆ դեսպանատանը՝ պահանջելով դադարեցնել միջամտությունը Ռուսաստանի ներքին գործերին։ Այս մասին հայտնում է РИА Новости-ն՝ հղում անելով ՌԴ ԱԳՆ ղեկավարությանը մոտ կանգնած աղբյուրին։

Գործակալության զրուցակցի խոսքով՝ գրությունն ուղարկվել է փետրվարի 7-ին։ Դրանում նշված է, որ միջամտությունը Ռուսաստանի Դաշնության ներքին գործերին անհամատեղելի է դիվանագիտական ​​ներկայացուցչության կարգավիճակի հետ։

«Ամերիկացի դիվանագետներին նախազգուշացվել է, որ անընդունելի են դիվերսիոն աշխատանքի իրականացման, «ազդեցության գործակալների» հավաքագրման փորձերը՝ ռուսական հասարակության մեջ տարաձայնություններ սերմանելու, հակապետական ելույթներ հրահրելու նպատակով։ Դրա մեջ ներգրավված աշխատակիցները կհեռացվեն՝ անկախ զբաղեցրած պաշտոնից»,- ընդգծել է աղբյուրը։

Նրա խոսքով՝ Ռուսաստանի Դաշնությունում ԱՄՆ նոր դեսպան Լին Թրեյսին «խիստ զգուշացում է ստացել, որ անհրաժեշտ է խստորեն պահպանել ռուսական օրենքները եւ դադարեցնել այն գործողությունները, որոնք հակասում են Ռուսաստանի Դաշնության իշխանությունների պահանջներին ու դիվանագիտական հարաբերությունների մասին Վիեննայի կոնվենցիայի դրույթներին»:

Գերատեսչությունը նաև նշել է, որ ռուսական կողմը մտադիր չէ համակերպվել «կատաղի հակառուսական քարոզչությանը», որը բազմացվում է ամերիկյան դիվանագիտական ​​ներկայացուցչության տեղեկատվական ռեսուրսներով։