«Ժողովուրդ». Հովիկ Հովսեփյանին կհասկանա՞ն

Թերթը գրում է. «Խարդախություն կատարելու համար ՀՀ գլխավոր դատախազությունում քրեական գործ է հարուցվել «Գապբնակշին» ՍՊԸ տնօրենի դեմ: Խոսքը Արամի-Բուզանդ փողոցների խաչմերուկում կառուցված էլիտար շենքի մասին է, որի բնակարանները «Գապբնակշին» ընկերությունը վաճառել է մի քանի հոգու միաժամանակ: Նույնաբովանդակ խնդիր էր ծագել նաև Երևանի Մաշտոցի պողոտայում գտնվող «Մալիբու» սրճարանի մոտ «Հերմեքս» ընկերության կառուցած էլիտար շենքի դեպքում. «Ժողովուրդ»-ն իր նախորդ համարներից մեկում անդրադարձել էր այս խնդրին՝ տեղեկացնելով, որ այդ ողջ պատմության կնքահայրը եղել են Սերժ Սարգսյանի վերահսկողական ծառայության ղեկավար Հովիկ Հովսեփյանը, եղբայրը՝ Հակոբ Հովսեփյանը, և նրանց բարեկամ, ֆինանսների նախարարության աշխատակից Հայկ Դավթյանը: Նույն եռյակը կարծես գործել է նաև այս դեպքում: Եվ այսքանից հետո թերևս դժվար չէ կռահել, որ այս քրեական գործը հարուցվել է ոչ թե արդարությունը վերականգնելու նպատակով, այլ խարդախության նման դեպքերը մեկ տանիքի տակ միավորելու համար, որպեսզի այդ մեկը «ճշտով» «փակի գործերը» և մարդկանց բաժանի իրենց հասանելիքը: Ի դեպ նախագահականի վերահսկողական ծառայության պետ Հովիկ Հովսեփյանից մեկնաբանություններ ստանալու մեր բոլոր փորձերն ապարդյուն անցան: Ուշագրավ ևս մեկ փաստ, տարիներ առաջ նման դեպքեր գրանցվեցին նաև Մոսկվայում, որոնք ավարտվեցին կրակոցներով»: