Balenciaga-ի կրեատիվ տնօրենը հայտարարել է, որ երեխաների մասնակցությամբ գովազդային արշավը կապված է եղել պանկ-մշակույթի հետ

Balenciaga-ի կրեատիվ տնօրեն Դեմնա Գվասալիան բացատրել է, որ սկանդալային գովազդային արշավը, որից հետո բրենդը մեղադրվել է մանկապղծություն քարոզելու մեջ, կապված է եղել ոչ թե BDSM-ի, այլ պանկ-մշակույթի հետ։ Այս մասին նա խոսել է Vogue ամսագրին տված հարցազրույցում։

Դիզայների խոսքով՝ Gift Shop նվերների հավաքածուի գովազդը նպատակ ուներ սպառողին ցույց տալ իր մեջ ներառված տարատեսակ իրեր, այդ թվում՝ մանկական հագուստ։

«Դա իրար հետ կապ չունեցող իրերի մի ամբողջ շարք էր, և գաղափարն այն էր, որ տարբեր բաներ նկարահանվելու են միասին: «Նվերների խանութի» համար ընտրվել էին մանկական հագուստներ, ինչպես նաև արջուկների տեսքով պայուսակներ, որոնք պատկանում են պանկ-մշակույթին և ինքնագործ իրեր՝ ոչ BDSM, որոնք 2022 թվականի հոկտեմբերի ցուցադրության ժամանակ կրել են մեծահասակները», - բացատրել է Դեմնա Գվասալիան:

Նա խոստովանել է, որ սխալվել է՝ համաձայնելով երեխաների մասնակցությամբ բազմաթիվ իրերով նկարահանմանը։

«Ես չէի հասկանում, թե որքան անպատշաճ էր այս բոլոր առարկաները տարածելը և երեխային դեռ կենտրոնում դնելը: Ցավոք սրտի, դա վատ գաղափար էր և իմ սխալ որոշումն էր»,- ասել է նա:

Նա նշել է, որ ափսոսում է այդ որոշման համար, և որ այս պատմությունից հետո հետևություններ է արել։