Կիպրոսի ԱԳՆ-ն հայտարարել է, որ Թուրքիան «բարեհամբույր կերպով մերժել է» Նիկոսիայի օգնության առաջարկը

Թուրքական իշխանությունները մերժել են Կիպրոսի առաջարկը՝ երկիր ուղարկել փրկարարական խումբ՝ երկրաշարժից հետո օգնություն ցուցաբերելու համար, հայտնել է Կիպրոսի ԱԳՆ-ն։ Ինչպես նշել են գերատեսչությունում, սկզբում Անկարան աջակցել է Նիկոսիայի համապատասխան նախաձեռնությանը։

«Չնայած ի սկզբանե ընդունելով փրկարարական օգնության մեր առաջարկը՝ Թուրքիան «բարեհամբույր կերպով մերժեց» տեղում որոնողափրկարարական խումբ տեղակայելու Կիպրոսի առաջարկը <…> Առաջարկը մնում է ուժի մեջ», - ասված է Կիպրոսի արտաքին գործերի նախարարության հաղորդագրության մեջ, որը տեղադրված է Twitter-ում։

Ինչպես նշվում է նախարարությունում, Կիպրոսի իշխանությունները երախտապարտ են հանրապետության փրկարարներին, որոնք միշտ և ամենուր պատրաստ են կյանքեր փրկել։ Միաժամանակ, երկրի փրկարարական թիմը փետրվարի 8-ից սպասում է Անկարայի որոշմանը՝ պատրաստ լինելով մեկնել երկրաշարժից տուժած պետություն՝ Եվրամիության քաղաքացիական պաշտպանության մեխանիզմի շրջանակներում։