Կիմ Չեն Ընը սկսել է հանրության առաջ հայտնվել 9-ամյա դստեր հետ. պատճառը հայտնի է

Հյուսիսային Կորեայի բռնապետ Կիմ Չեն Ընը սկսել է ավելի ու ավելի շատ իր ընտանիքի անդամների հետ հայտնվել հանրության առջեւ։ Մասնավորապես, վերջին ռազմական միջոցառմանը նա ժամանել է իր 9-ամյա դստեր՝ Կիմ Չժու Է.-ի հետ։

Աղջիկը Հյուսիսային Կորեայի բռնապետի և նրա կնոջ հետ ներկայացել է Փհենյանի զինվորական զորանոցում կազմակերպված բանկետին: Այս մասին հայտնում է CNN-ը։

Բացի երեխայի հետ հանրության առաջ հայտնվելուց, Կիմ Չեն Ընը նաև ամպագոռգոռ հայտարարություն է արել։ Մասնավորապես, նա հայտարարել է, որ Կիմի ընտանիքը կկառավարի Հյուսիսային Կորեան եւս մեկ սերունդ, և իրենք միջուկային զենք կունենան, որպեսզի ոչ ոք չկարողանա վիճարկել դա։

Հարկ է նշել, որ ճշգրիտ հայտնի չէ, թե Կիմը քանի երեխա ունի։ Այնուամենայնիվ, լրագրողները կարծում են, որ Կիմ Չեն Ընը երեք երեխա ունի, և Չժու Է.-ն նրա միջնեկն է, թեև Հյուսիսային Կորեայից դուրս որևէ մեկը չի կարող հաստատել դա։

Ենթադրություններն այն մասին, որ Չժու Էն Կիմի իրավահաջորդն է լինելու, ի հայտ են եկել դեռեւս անցած տարվա նոյեմբերից, երբ լրատվամիջոցները հրապարակել են լուսանկարներ, որոնցում նա եւ իր հայրը զննում են բալիստիկ հրթիռը՝ դրա փորձարկումից առաջ։

Հյուսիսային Կորեայի պետական լրատվամիջոցները հրապարակել են մի հոդված, որում պատկերված են հյուսիսկորեացի առաջնորդն ու նրա դուստրը։ Հոդվածում նա նկարագրվում է որպես «ամենասիրված երեխա»։