Իրանը պետք է քաղաքական մասնակցության դեր ստանձնի․ Ռուբեն Վարդանյանի հարցազրույցը՝ Shargh Daily-ին

Լեռնային Ղարաբաղի պետնախարար Ռուբեն Վարդանյանը իրանական Shargh Daily-ին հարցազրույց է տվել, որը նեկայացնում ենք ստորև․

«Մենք պետք է ընդգծենք, որ հայերի եւ իրանցիների միջեւ բարեկամությունը հազարամյակների պատմություն ունի եւ երբեք ուղղված չի եղել երրորդ երկրների դեմ: Մենք պետք է շարունակենք մեր ջանքերը, որպեսզի մեր բարեկամությունն ամրապնդվի։ 

Սակայն Ադրբեջանի կողմից հողերի օկուպացիայից հետո Իրանը բախվեց անվտանգային խնդիրների։ Ուստի Իրանը պետք է քաղաքական մասնակցություն եւ կայունացնող դեր ստանձնի, որպեսզի կանխի անվտանգության խնդիրների էսկալացիան, ինչը կարող է աղետալի հետեւանքներ ունենալ ողջ տարածաշրջանի համար։

Ես նաև ուզում եմ հիշեցնել Իրանի գերագույն առաջնորդի խոսքերը պատերազմի ժամանակ, ով ասաց, որ Արցախում ապրող հայերի անվտանգությունը պետք է պահպանվի։ Այդ պատճառով ես վստահ եմ, որ Իրանը ակտիվորեն կխաղա իր դերը տարածաշրջանում իրական խաղաղության հաստատման գործում՝ հաշվի առնելով բոլոր կողմերի արդարացի շահերի պահպանումը»։