Իսրայելը պատրաստ է 200 միլիոն դոլարի օգնություն տրամադրել Ուկրաինային

Իսրայելը պատրաստ է 200 միլիոն դոլարի օգնություն տրամադրել Ուկրաինային և աջակցել նախագահ Վլադիմիր Զելենսկու խաղաղության ծրագրին, հայտարարել է Իսրայելի արտգործնախարար Էլի Քոհենը։ Նրան մեջբերում է իսրայելական Jerusalem Post թերթը։

«Ես հպարտ եմ, որ այս դժվարին ժամանակներում Ուկրաինայի կողքին եմ»,- ասել է իսրայելցի դիվանագետը Կիևում իր ուկրաինացի գործընկեր Դմիտրի Կուլեբայի հետ հանդիպման ժամանակ։

Քոհենն ընդգծել է, որ 200 մլն դոլարը նախատեսվում է ծախսել մարդասիրական օգնության վրա, սակայն Ուկրաինայի իր գործընկերն ընդգծել է, որ «մարդասիրական օգնությունը կարևոր է, բայց առաջին հերթին կարևոր է հաղթել այս պատերազմում»։

Փետրվարի 16-ին Քոհենը նաև Բուչա է այցելել Ուկրաինա կատարած պաշտոնական այցի ընթացքում։ Ինչպես հայտնում է The Times of Israel-ը, նա ծաղկեպսակ է դրել տեղի 116 բնակիչների զանգվածային գերեզմանին։ Իսրայելի ԱԳՆ ղեկավարն այցելել է նաեւ Բաբի Յարի հուշահամալիր։ Նրա խոսքով՝ այս այցը պետք է ցույց տա Իսրայելի համերաշխությունը հանրապետության ժողովրդի հետ։ Քոհենը նշել է, որ իսրայելական կողմը կշարունակի մարդասիրական օգնություն ցուցաբերել։

Փետրվարի 12-ին Իսրայելը հաստատել է Մոսկվայի և Կիևի միջև բանակցություններում միջնորդ դառնալու իր պատրաստակամությունը։