Ինչ գործունեությամբ է աչքի ընկել Սուրբ Աթոռում ՀՀ դեսպան Կարեն Նազարյանը

Շարունակելով ընթերցողների ուշադրությանը ներկայացնել արտերկրում հավատարմագրված ՀՀ արտակարգ և լիազոր դեսպանների գործունեությունը՝ այսօր կանդրադառնանք Սուրբ Աթոռում ՀՀ արտակարգ և լիազոր դեսպան Կարեն Նազարյանի գործունեությանը: Վերջինիս կենսագրությունը բավական հարուստ է: 2002-2004թթ. Նազարյանը աշխատել է որպես ՀՀ ԱԳ նախարարի խորհրդական, Հայ-ամերիկյան միջկառավարական հանձնաժողովի անդամ, 2005-2009թթ.՝ Իրանի Իսլամական Հանրապետությունում ՀՀ դեսպան՝ նստավայրը Թեհրան, 2009-2014թթ.՝ ՄԱԿ-ում ՀՀ դեսպան, մշտական ներկայացուցիչ՝ նստավայրը Նյու Յորք, 2014թ. մայիսի 22-ին ՀՀ նախագահի հրամանագրով նշանակվել է ՀՀ ԱԳ նախարարի տեղակալ, 2015 և 2016թթ. համանախագահել է Երևանում անցկացված «Ընդդեմ ցեղասպանության հանցագործության» գլոբալ ֆորումները, 2015-2017թթ. ՀՀ և ԵՄ միջև Համապարփակ և ընդլայնված գործընկերության համաձայնագրի բանակցություններում հայկական կողմից հանդես է եկել որպես գլխավոր բանակցող: Նախագահել է հայ-հունական և հայ-կիպրական միջկառավարական հանձնաժողովները, 2018թ․ հունիսի 8-ին ՀՀ վարչապետի որոշմամբ վերանշանակվել է ԱԳ նախարարի տեղակալ, 2018թ․ դեկտեմբերի 28-ին ՀՀ նախագահի հրամանագրով նշանակվել է Սուրբ Աթոռում ՀՀ դեսպան՝ նստավայրը։ 2019թ․ հուլիսի 26-ին ՀՀ նախագահի հրամանագրով նշանակվել է Մալթայի Ինքնիշխան Ռազմական Ուխտում, իսկ օգոստոսի 9-ին՝ Պորտուգալական Հանրապետությունում ՀՀ դեսպան՝ նստավայրը Հռոմ։

Արտերկրում հավատարմագրված Հայաստանի ցանկացած դեսպանի հաջողության թիվ մեկ գրավականը տեղի հայ համայնքի, հայկական կազմակերպությունների, էթնիկ լոբբիստական կառույցների և ավանդական կուսակցությունների հետ տարվող աշխատանքներն ու անխափան համագործակցությունն է: Այս առումով, անշուշտ, պետք է հաշվի առնել ընդունող երկրի առանձնահատկությունները և այն հանգամանքը, որ համայնք որպես այդպիսին այստեղ առկա չէ: Փոխարենը կարող ենք նշել, որ բավական ակտիվ համագործակցություն է ընթանում հոգևորականների հետ: Հունիսի 21-ին Սուրբ Աթոռում ՀՀ դեսպանություն այցելեցին բարձրաստիճան հայ հոգևորականները:

Ընդունող պետության գործադիր իշխանության հետ աշխատանքը ցանկացած դեսպանի համար կարևորագույն առաջնահերթություն է։ Ի՞նչ իրավիճակ է այս առումով: Դեկտեմբերի 16-ին դեսպան Կարեն Նազարյանը Սուրբ Աթոռի պետությունների և միջազգային կազմակերպությունների հետ հարաբերությունների քարտուղար (ԱԳ նախարար) գերպ. Փոլ Ռիչարդ Գալագերին հանձնեց Հայաստանի Հանրապետության Բարեկամության շքանշանը:  Հունիսի 17-ին Սուրբ Աթոռում ՀՀ դեսպան Կարեն Նազարյանը հանդիպում ունեցավ հայաստանյան հասարակական կազմակերպությունների ներկայացուցիչների հետ, ովքեր դեսպանություն էին այցելել Հայաստանում ՄԱԿ-ի Բնակչության հիմնադրամի գրասենյակի ղեկավարի ուղեկցությամբ։Հռոմում անցկացվող ՄԱԿ-ի ծերացման հարցերով նախարարական համաժողովի շրջանակներում ՀՀ աշխատանքի և սոցիալական հարցերի նախարար Նարեկ Մկրտչյանը՝ Սուրբ Աթոռում ՀՀ դեսպան Կարեն Նազարյանի ուղեկցությամբ հանդիպումներ է ունեցել հայ կաթողիկե եկեղեցու ու հաստատությունների ներկայացուցիչների հետ։ 

Ինչ իրավիճակ է հանրային դիվանագիտության դաշտում: Բավական ակտիվ է գործում դեսպանատան ֆեյսբուքյան էջը, որտեղ բացի ԱԳՆ հայտարարությունների ռելիզներից՝ կարելի է հանդիպել նաև դեսպանի գործունեությունը լուսաբանող գրառումների: Բացի այդ, դեսպան Նազարյան բավական ակտիվ է հանրային հարթակներում և պարբերաբար հանդես է գալիս Արցախի հիմնահարցի և մասնավորապես՝ Լաչինի միջանցքի շրջափակման վերաբերյալ պարզաբանումներով:

Դեսպան Նազարյանը հանդես է եկել նաև հոդվածների շարքով, որոնցում մերկացնում է ադրբեջանական քարոզչամեքենայի կեղծիքները։