Ինչ ունեցվածք են հայտարարագրել Վայոց Ձորի մարզպետն ու փոխմարզպետը

Շարունակելով ներկայացնել բարձրաստիճան պաշտոնատար անձանց հայտարարագրերը՝ այսօր կանդրադառնանք Վայոց Ձորի մարզպետին և փոխմարզպետներին

Վայոց ձորի մարզպետ Արարատ Գրիգորյանը, 2021 թվականի մարտի 30-ին ներկայացրած հայտարարագրի համաձայն, որևէ բան չունի։ Մարզպետի ողջ հայտարարագիրը դատարկ է, բացառություն է կազմում միայն եկամուտի բաժինը։ Մարզպետն ունեցել է եկամուտի մեկ աղբյուրը՝ աշխատավարձ մարզպետարանից, որը կազմել է 11,334,108 դրամ։ 2020-ին Արարատ Գրիգորյանը ևս շարժական կամ անշարժ գույք չի հայտարարագրել, սակայն որպես բանկային հաշվում առկա գումար՝ հայտարարագրել էր  6 մլն 870 հազար դրամ: Սակայն ուշագրավ է, որ նա 2019 թվականի համար որպես եկամուտ հայտարարագրել էր ձեռնարկատիրական գործունեությունից ստացված եկամուտ՝ տարբեր գումարների չափով:

Փոխմարզպետ Դավիթ Սարգսյանը հայտարարագրել է բնակարան, 3,000,000.00 դրամի հանձնած և ստացված փոխառություն։ Պաշտոնյայի բանկային հաշվի մնացորդը կազմել է 3,760,635.00 դրամ: Կանխիկը՝ 8,000,000.00 դրամ: Հաշվետու տարվա եկամուտները կազմել են 7,298,639.00 դրամ: Ստացված վարկերը կազմել են 1,406,100.00 դրամ: Սարգսյանի ծախսերը կազմել են 2,155,000.00 դրամ, այդ գումարը ուղղվել է վարկի տոկոսադրույքների մարմանն ու անշարժ գույքի վերանորոգմանը: