Ինչ ունեցվածք են հայտարարագրել Շիրակի մարզպետն ու փոխմարզպետը

Շարունակելով ներկայացնել բարձրաստիճան պաշտոնյաների ներկայացրած գույքի և եկամտի հայտարարագրերը՝ այսօր կանդրադառնանք Շիրակի մարզպետ Մուշեղ Մուրադյանին և վերջինիս տեղակալին։

Եվ, այսպես, ինչ վերաբերվում է ընդամենը շաբաթներ առաջ մարզպետի պաշտոնին նշանակված Մուրադյանին, ապա պետք է նշել, որ նա իր եկամուտների մասին դեռ հայտարարագիր չի ներկայացրել, սակայն լրագրողներին պարզաբանել է, որ 10 տարուց ավելի բնակվում է իր հայրական տանը։ Մուշեղ Մուրադյանի հայրը Ամասիայի տարածաշրջանի Զորակերտ գյուղում շուրջ 30 տարի զբաղվել է անասնապահությամբ, հոր մահից հետո անասնապահական ֆերմաներին, բնականաբար, ինքն է տիրություն անում։

Շիրակի մարզպետի տեղակալի պաշտոնը զբաղեցնող Ալբերտ Այվազյանը վերջերս հայտնվել էր մամուլի ուշադրության կենտրոնում: Նրա անունը շաղկապվում էր «Մի LEXUS-ի պատմության» հետ,  երբ վերջինս Ախուրյանի համայնքապետարանին պատկանող Lexus մակնիշի ավտոմեքենան պահանջել և ավագանու հաստատմամբ ստացել էր որպես ՔՊ խմբակցության սպասարկող մեքենա, բայց օգտագործում է սեփական կարիքների համար։ Ի դեպ, Այվազյանը սկզբից պնդում էր, որ ամեն ինչ օրինական է, բայց մարզպետի պարտականությունները կատարելու ժամանակ իր ձեռամբ ստորագրում է հանձնարարական` ավագանու որոշումը համապատասխանեցնել ՀՀ օրենսդրությանը և արդյունքի մասին տեղեկություն փոխանցել Շիրակի մարզպետարան։