«Է՛ն ուրիշ Ֆրունզիկը»

Դեկտեմբերի 23-ին՝ ժամը 17.00, «Մոսկվա» կինոթատրոնում տեղի կունենա «Է՛ն ուրիշ Ֆրունզիկը» վավերագրական ֆիլմ-էսսեի ցուցադրումը։ Ֆիլմը 65 րոպե տևողությամբ է և Մհեր Մկրտչյանի մասին բոլորովին նոր խոսք է՝ պատրաստված հազվագյուտ տեսանյութերի և ձայնագրությունների հիման վրա։

Ֆիլմ-էսսեն ներկայացնում է թատրոնում և կինոյում մեծ դերասանի անցած ուղին, մատնանշում ձեռքբերումները, ներկայացնում նրա ասելիքը մարդկանց, բնության, հավերժության մասին, կյանքի տարբեր ոլորտների վերաբերյալ նրա խոհերը, մտորումները, տագնապներն ու հորդորները։

Ֆիլմի պատրաստման աշխատանքները սկսվել են դեռևս 2010 թվականին: Ստեղծվեց 40 րոպեանոց ֆիլմ-էսսե, որը Մհեր Մկրտչյանի 80-ամյակի տարում ցուցադրվել է նրա հայրենի քաղաքում՝ Գյումրիում: Այնուհետև ֆիլմի այդ տարբերակը ցուցադրվել է նաև Ստեփանակերտում: Մի քանի անգամ վերամոնտաժման արդյունքում ստացվել է նոր՝ 65 րոպեանոց ֆիլմ, որի շնորհանդեսը կկայանա դեկտեմբերի 23-ին:

«Է՛ն ուրիշ Ֆրունզիկը» վավերագրական ֆիլմ-էսսեի պրեմիերայի օրը բացման խոսքով հանդես կգան ֆիլմի համահեղինակները, կներկայացվի ստեղծագործական խումբը, կցուցադրվի ֆիլմը, այնուհետև կկազմակերպվի քննարկում:

Ֆիլմը ցուցադրում է «ԱՎՏ» ստուդիան՝ Հայաստանի երիտասարդական հիմնադրամի աջակցությամբ։