Արտաշատի համայնքապետ Կառլեն Մկրտչյանի ուշագրավ գնումները

Վերլուծական 27 Փետրվար, 2023 22:26

Արտաշատի համայնքապետ Կառլեն Մկրտչյանի ուշագրավ գնումները

Շարունակելով անդրադառնալ ՔՊ-ական համայնքապետերին, նրանց կատարած աշխատանքին և ուշագրավ գնումներին՝ այսօր կանդրադառնանք Արտաշատի համայնքապետ Կառլեն Մկրտչյանին: Վերջինս 2021-ի հոկտեմբերին Նիկոլ Փաշինյանի կողմից նշանակվել էր համայնքապետի ԺՊ, իսկ դեկտեմբերին ՏԻՄ ընտրություններում արդեն ընտրվել այդ պաշտոնում։ Այս ընթացքում Մկրտչյանը, ըստ համայնքապետարանի պաշտոնական կայքի, աչքի չի ընկել որևէ բովանդակալից և համայնքի համար կենսական խնդիրների լուծմամբ, փոխարենը՝ ի հայտ են եկել բազմաթիվ դրվագներ, որոնք այս թե այն կերպ ստիպում են հեղափոխական ղեկավարի և այսպես կոչված՝ նախկինների աշխատելաոճի միջև որոշակի զուգահեռներ անցկացնել։

Դիցուք` մամուլը գրում է, որ ՏԻՄ ընտրությունների նախօրեին Արտաշատում «ՔՊ»-ական քաղաքապետի թեկնածուն Կառլեն Մկրտչյանը բաժանել է մինչև 600 դոլար՝ իր ենթականերին՝ պրեմիայի անվան տակ: Ընդհանուր առմամբ, շուրջ 11 միլիոն դրամի պարգևավճար է ՏԻՄ ընտրություներից առաջ բյուջեի հաշվին նվիրել մարդկանց ՔՊ-ական թեկնածուն: Ընդգծենք՝ այսօր Սյունիքում համայնքապետերի մեծ մասի նկատմամբ հենց այս հոդվածով են քրգործեր հարուցված։

ԶԼՄ-ից մյուսը «Իրավունք»-ը գրել էր, որ Արտաշատ խոշորացված համայնքի ՔՊ-ով առաջադրված եւ ընտրված համայնքապետ Կառլեն Մկրտչյանը, ով մինչ ավագանու ընտրությունները արտաշատցիների շրջանում ուներ «մեր տղա» համբավը, բազմելով համայնքապետի աթոռին, ստանձնելով 39 համայնքի մլրդ. դրամի հասնող բյուջեի ղեկավարությունը, ըստ նշված լրատվամիջոցի աղբյուրի, դարձել է ինքնահավան, որոշումներ է կայացնում միայն իր ու մերձավորների շահերից ելնելով: Իսկ ավագանու նիստերից մեկի ժամանակ վերջինս սահմանափակել է ՀԿ-ների ղեկավարների մուտքը եւ զրկել ձայնի իրավունքից, ավելին, մեղմ ասած, վռնդել է դուրս, ինչը բարձրաձայնել է նաեւ ՀԿ-ի ղեկավարներից մեկը։

Ի դեպ, շատ էին խոսակցություններն այն մասին, որ Կառլեն Մկրտչյանի հաղթանակին նպաստել են նախկին իշխանությունները, ավելի հստակ՝ Արտաշատի վաղեմի «տիրակալ» Հովիկ Աբրահամյանը, առանց որի դժվար թե ՔՊ թեկնածուն կարողանար համայնքում այդքան ձայն հավաքել։ Ասվածի ապացույցներից մեկն էլ այն է, որ այս տարի Հարության տոնին, Հովիկ Աբրահամյանը եկեղեցու բակում «ձու է կռվացրել» Կառլեն Մկրտչյանի հետ։ Փաստորեն, մինչ Նիկոլ Փաշինյանը Երևանում հայտարարում է, որ ոչ մի համագործակցություն նախկինների հետ չի լինելու, որ ոչ մի ձուկ, ոչ մի մուկ չի պլստալու` նրա քաղաքապետը նախկինների հետ ջան ասում, ջան լսում է։

Մկրտչյանի շուրջ մեկ տարվա բուռն գործունեությանը անդրադառնալիս հարկ է հայացք գցել համայնքապետարանի պաշտոնական կայքում տեղ գտած հիմնական նորություններին, այն է՝ կայացած նարդու առաջնություն, համայնքապետի շնորհավորական խոսքեր, գեղարվեստի դպրոցի հաշվետու ցուցահանդես, համապետական շաբաթօրյակ, ծառատունկ: Քիչ թե շատ լուրջ աշխատանքներից կարելի է առանձնացնել միայն սուբվենցիոն ծրագրերի շրջանակում համայնքների մի շարք ճանապարհների ասֆալտապատումը: Չկան հեղափոխական, նորարարական պրոյեկտներ, չկա ոչ մի խոսք ներդրումային ծրագրերի մասին:

Ոչ պակաս ուշագրավ է Արտաշատի համայնքապետարանի այս տարվա գնումները: Կենցաղային աղբի հավաքման ծառայություն է գնվել մի ՍՊԸ-ից, որը հարկայինի կողմից տուգանքի է ենթարկվել:

Ոչ պակաս հետաքրքիր է համայնքապետարանի գնումների պլանը: 20000000 դրամով ձեռք է բերվելու կամ արդեն իսկ ձեռք է բերվել Սեդան թափքով ավտոմեքենա: Փոխադրամիջոցների հետ կապված ապահովագրական
ծառայությունների համար հատկացվել է 783000 դրամ: Ուղևորափոխադրող ավտոմեքենաների վարձակալության վրա` վարորդի հետ միասին 500 000 դրամ: 849 հազար դրամ է հատկացվելու դրոշների ձեռք բերմանը: 9000,0 դրամ սգո ծառայություններ գնելուն: 70000 դրամի զուգարանի խոզանակ, 200000 դրամի զուգարանի թուղթ, 265000 դրամի աղբարկղ, 550000 և 200000 դրամի օդորակիչ, 320000 և 1250000 դրամի համակարգիչ, 980000 դրամի մուտքը կասեցնող սարք, 985 հազար դրամի աթոռ և բազկաթոռ, 1200000 դրամի էլ անշարժ գույք՝ հող է ձեռք բերվելու:

Այս թեմայով

«Որտեղ մարդկանց նպատակը Նիկոլի դեմ պայքարն է, ուրեմն մեր ներկայացուցիչներն էնտեղ են». Աննա Մկրտչյան (տեսանյութ)

Սիսիանի համայնքապետ Արմեն Հակոբջանյանը հրաժարական կտա․ ով է նրա դեմ դավեր նյութել