Անհետացած ՏՏ միլիարդատերը հայտնաբերվել է․ Bloomberg

Չինաստանի խոշորագույն ներդրումային բանկերից մեկի՝ China Renaissance Holdings (CRH) ղեկավար Բաո Ֆանն օգնում է չինական իշխանություններին հետաքննության մեջ, որի մանրամասները չի կարելի հրապարակայնորեն բարձրաձայնել։ Այսպիսի հայտարարություն է արել CRH-ի ներկայացուցիչը Bloomberg-ին տված մեկնաբանությունում։

Նշվում է, որ սա Չինաստանից ՏՏ միլիարդատիրոջ գտնվելու վայրի մասին առաջին հրապարակային տեղեկությունն է նրա անհետանալուց հետո մեկ շաբաթ անց։

«Պարոն Բաոն ներկայումս համագործակցում է Չինաստանի Ժողովրդական Հանրապետության իշխանությունների կողմից իրականացվող հետաքննությունում։ CRH-ը կհամագործակցի և կաջակցի Չինաստանի իշխանությունների ցանկացած օրինական պահանջի դեպքում, եթե և երբ դրանք արվեն», - ասվում է հայտարարության մեջ:

Գործակալության տվյալներով՝ Բաո Ֆանի անսպասելի անհետացումն անհանգստացրել է չինական գործարար վերնախավին և տեղիք տվել ենթադրությունների, որ երկրի ֆինանսական ոլորտը Պեկինի կողմից կկանգնի ուժեղացված հսկողության տակ:

Որպես Չինաստանի առաջատար ՏՏ ներդրումային բանկի ղեկավար՝ Բաո Ֆանը լայն կապեր ունի բիզնեսի տարբեր ոլորտներում և եղել է Չինաստանի որոշ խոշորագույն ընկերությունների ֆինանսիստ։