Ռուսաստանը ողջունում է Բաքվի և Երևանի միջև հարաբերությունների կարգավորմանն ուղղված այլ երկրների ջանքերը․ Լավրով

Ռուսաստանը ողջունում է այլ պետությունների ցանկացած ջանքեր, որոնք ուղղված են Ադրբեջանի և Հայաստանի միջև հարաբերությունների կարգավորմանը, ինչպես նաև տարածաշրջանում փոխշահավետ համագործակցության ամրապնդմանը։ Այս մասին երկուշաբթի օրը Բաքվում Ադրբեջանի ղեկավար Իլհամ Ալիեւի հետ հանդիպմանը հայտարարել է ՌԴ ԱԳ նախարար Սերգեյ Լավրովը։ Այս մասին հայտնում է ՏԱՍՍ-ը։

«Մեր միջազգային գործընկերներից շատերը, ներառյալ նրանք, ովքեր գտնվում են այս տարածաշրջանից հեռու, ցուցաբերում են մեծ հետաքրքրություն՝ Ադրբեջանի և Հայաստանի միջև կարգավորման ուղղությամբ առաջընթացին նպաստելու համար։ Մենք, ինչպես բազմիցս ասել է Ռուսաստանի նախագահ Վլադիմիր Պուտինը, ողջունում ենք ցանկացած ջանք, որը ելնում է իրավիճակի կայունացման շահերից և պայմաններ ստեղծելու համար, որպեսզի այստեղ գտնվող բոլոր երկրները նորմալ համագործակցելու հնարավորություն ունենան՝ փոխադարձ հարգանքի հիման վրա, փոխշահավետության հիման վրա, ի շահ իրենց երկրների և ժողովուրդների»,- ասել է Լավրովը։

Նրա խոսքով՝ տարածաշրջանային անվտանգությունը մնում է թեժ թեմա ինչպես երկկողմ, այնպես էլ բազմակողմ ձևաչափերում։