Էրդողանը փող է բաժանել երկրաշարժերից տուժած քաղաքացիներին և արժանացել քննադատության (տեսանյութ)

Թուրքիայի նախագահ Ռեջեփ Թայիփ Էրդողանը Ադիյաման կատարած այցի ընթացքում փող է բաժանել իր շուրջը հավաքված երեխաներին և բարկացրել սոցցանցերի թուրք օգտատերերին:

Ինչպես հաղորդում է duvar կայքը, Էրդողանի այս քայլը բուռն արձագանք է առաջացրել սոցիալական ցանցերում: Նշվում է, որ երկրաշարժից տուժած շրջան այցի ընթացքում Էրդողանն առաջին անգամ ասել է «կներեք» բառը՝ աղետի հետ կապված կառավարության ողբերգական սխալների համար: «Ցնցումների կործանարար ուժի եւ եղանակային վատ պայմանների պատճառով երկար օրեր չկարողացանք աշխատել Ադիյամանում այնպես, ինչպես ուզում էինք: Ներողություն եմ խնդրում դրա համար», - Թուրքիայի նախագահի խոսքերը մեջբերում է «Անադոլու» լրատվական գործակալությունը:

Էրդողանը հայտարարել է, որ «աշխարհում երբեք չի եղել մի երկիր, որը կարողանար այնքան արագ վերականգնվել, որքան մենք այն բանից հետո, որ բախվեցինք աղետի, որից տուժել է այդքան մեծ թվով մարդ այս հսկայական տարածքում»։

Ընդ որում, նա հայտարարել է, թե այդ տարածքում մոտ 50 հազար տուն է կառուցվելու, իսկ երկրաբանական հետազոտություններն ավարտվելուն պես աշխատանքները կսկսվեն։ «Մեր ժողովրդին խոստանում եմ, որ մինչև տարեվերջ երկրաշարժի հասցրած վերքերը մեծ մասամբ ապաքինված կլինեն»,- ասել է նա։