Սերբիայում մտածում են Ռուսաստանի հետ հարաբերությունները վերանայելու մասին․ Politico

Սերբիայի նախագահ Ալեքսանդր Վուչիչը դժվար ընտրության առաջ է կանգնել, քանի որ վերանայում է Մոսկվայի հետ Բելգրադի սերտ հարաբերությունները, Lenta.ru-ի փոխանցմամբ՝ հայտնում է Politico-ն։

Հրատարակությունը նշում է, որ Սերբիայի նախագահը դժգոհ է «Վագներ» մասնավոր ռազմական ընկերությունում սերբերի հավաքագրման մասին տեղեկությունից։ Նա խոստացել է ձերբակալել երկրի քաղաքացիներին, ովքեր մասնակցել են Ուկրաինայում ռազմական գործողություններին «Վագներ»-ի կազմում։ Մյունխենի անվտանգության համաժողովի շրջանակներում Politico-ին տված բացառիկ հարցազրույցում Վուչիչը նշել է, որ «ժամանակն է վերաիմաստավորել»։

Միևնույն ժամանակ, հրատարակությունը հիշեցնում է, որ ավելի վաղ Վուչիչը EurActiv հեռուստաալիքին տված հարցազրույցում ասել էր, որ երկիրը բարդ ընտրության առաջ է կանգնած։ «Անկասկած, ապագայում մենք ստիպված կլինենք բարդ ընտրություն կատարել։ Դա այն ամենն է, ինչ ես կարող եմ ասել»,- ասել է Սերբիայի ղեկավարը։