Պաշտոնյաների աննապատակ գործուղումները՝ հարկատուների հաշվին. Վահան Քերոբյան

ՀՀ էկոնոմիկայի նախարար Վահան Քերոբյանը փետրվարի 23-25-ը գտնվում էր Ֆրանսիայում: Նախարարի գլխավորած պատվիրակությունը Ֆրանսիայի մայրաքաղաք Փարիզում մասնակցել է Ֆրանսիա-Հայաստան առաջին տնտեսական գագաթնաժողովին և միջազգային գյուղատնտեսական ցուցահանդեսին (SIA) : 

Նշվում է, որ նախարար Վահան Քերոբյանը, փոխնախարար Նարեկ Տերյանը, մյուս տեղակալ Անի Իսպիրյանը, նախարարության միջազգային համագործակցության վարչության պետ Արմեն Այվազյանը և միջազգային համագործակցության վարչության երկկողմ և բազմակողմ համագործակցության բաժնի գլխավոր մասնագետ Աստղիկ Ալեքսանյանը Ֆրանսիայի Հանրապետություն են գործուղվել ՀՀ 2023 թվականի պետական բյուջեով՝ արտասահմանյան պաշտոնական գործուղումների համար նախատեսված միջոցների հաշվին:

Ծառայողական գործուղման մեկնած անձանց գործուղման ծախսերի փոխհատուցումը կատարվում է 29 դեկտեմբերի 2005 թվականի որոշման համաձայն: Ըստ այդմ,  Փարիզ մեկնելու համար մեկ օրվա օրապահիկը սահմանված է 130 եվրո, իսկ գիշերակացի համար էլ տրամադրվում է 153 եվրո գումար, գրում է «Ժողովուրդ» օրաթերթը։ Այսինքն,  ստացվում է՝ Հայաստանի պատվիրակության՝ Ֆրանցիա այցը կարժենա 4 հազար եվրոյից (1 մլն 600 հազար դրամից ավելի) ավելի գումար:

Գործուղումների հաշվետվության էջում, սակայն, Վահան Քերոբյանի հաշվետվությունը չի գտնվել: Լրահոսից պարզ է դառնում, որ վերջինս մասնակցել է Ֆրանսիա-Հայաստան առաջին տնտեսական գագաթնաժողովին։ Գագաթնաժողովի շրջանակում նախարարը մասնակցել է նաև կլոր սեղան-քննարկմանը՝ նվիրված բարձր տեխնոլոգիաներին, ինչպես նաև կայուն և կանաչ տնտեսությանը (վերականգնվող էներգիա, թափոնների կառավարում, գյուղատնտեսություն և զբոսաշրջություն)։ Թե քննարկումը ինչ ռեալ արդյունքներ է տվել՝ հայտնի չէ: Անգամ նախարարի էջում, ով շատ է սիրում հպարտանալ իր տարաբնույթ հանդիպումներով և ունեցած ձեռքբերումներով, որևէ այլ տեղեկություն Ֆրանսիա կատարած այցից չկա: Պետք է ենթադրել, որ այցի ողջ արդյունավետությունը սահմանափակվել է կլոր սեղան-քննարկում կազմակերպելով։ Հարց է առաջանում՝ իսկ արդյո՞ք հնարավոր չէր այդ հանդիպումը կազմակերպել առցանց և խնայել պետական՝ առանց այդ էլ սուղ միջոցները...