Մեծամորի ՔՊ-ական համայնքապետ Վահրամ Խաչատրյանի ուշագրավ գնումները

Դեկտեմբերի ընտրություններում Մեծամորի համայնքապետ ընտրված ՔՊ-ական Վահրամ Խաչատրյանը որոշել է բյուջեի հաշվին շքեղ ծառայողական մեքենա ձեռք բերել։ Խոսքը մոտ 32 մլն դրամ արժողությամբ Toyota Prado ամենագնացի մասին է։ Դրա համար մրցույթ է հայտարարվել, որտեղ այնպիսի պարամետրեր են նշել, որոնցով հնարավոր չէ ավելի էժան ու ցածր դասի մեքենա ձեռք բերել։ Օրինակ՝ շարժիչի հզորությունը պետք է լինի առնվազն 3,5 աշխատանքային ծավալով եւ ոչ պակաս 250 ձ/ուժ-ից, պետք է ունենա all wheel drive համակարգ, տարատեսակ այլ հաճելի մանրուքներ, իսկ վազքը պետք է լինի ոչ ավելի, քան 60 հազար կմ։ Այսինքն՝ կարող է ձեռք բերվել նաեւ մասնավոր անձից եւ  լինել օգտագործված։ Մեզ ասացին, որ համայնքապետը դա հատուկ է արել, որպեսզի կոնկրետ անձից ձեռք բերվի կոնկրետ մեքենա։ Մրցույթն առաջին փուլով չի կայացել, քանի որ տվյալ անձը փաստաթղթերը թերի է ներկայացրել ու չի կարողացել մասնակցել։ Նկատենք, որ քաղաքապետերը հիմնականում ցածր դասի եւ ոչ թանկարժեք մեքենաներ են ձեռք բերում, օրինակ՝ Toyota Camry, որն առնվազն կրկնակի էժան է Prado-ից, քանզի 60-70 հազար դոլարանոց մեքենան փոքր համայնքի համար մեծ ճոխություն է։ Համայնքապետարանից ի դեմ արձագանքել էին՝ նշելով, որ այդ գնի մեքենայի մասին է խոսքը գնում, որովհետև մրցույթին մասնակցել է այդ մի մեքենան:

Ոչ պակաս ուշագրավ է 2023 թվականի գնումների պլանը, համաձայն որի՝ համայնքապետարանը շուրջ 1300000 հազար դրամի ծաղիկ է պատրաստվում գնել, 500 հազար դրամի զուգարանի թուղթ, 1 միլիոն դրամի համակարգչի մալուխ, 600 հազար դրամի մաքրող մածուկ, 700 հազար դրամի հատակի լվացման լաթ, 200 հազար դրամի լաթ, 2 միլիոն դրամի ներկայացուցչական ծախսեր, 995 հազար դրամի և 3 միլիոն դրամի միջոցառումների կազմակերպման ծրագրեր, 6 միլիոն 500 հազար դրամի մարդատար ավտոմեքենա, 140 հազար դրամի լուսապատճենահանող մեքենա, 980 հազար դրամի ոչ կանոնավոր ուղևորափոխադրման ծառայություններ, 300 հազար դրամի սննդի ծանրոցներ, 980 հազար դրամի խորհրդանշանական նվերներ:

Հասկանալի է, որ փոքր համայնքում այս գումարներով հնարավոր կլիներ շատ ավելի կենսական և օպերատիվ լուծում պահանջող խնդիրներ լուծել, սակայն, արի ու տես, որ համայնքապետարանում այլ կերպ են մտածում և դիցուք՝ ծաղկեփնջերն ու լուսապատճենահանող սարքը շատ ավելի կարևոր են, քան մեծամորցիների համար առանցքային հարցերին լուծում տալը: