Բաշար ալ Ասադը կայցելի Ռուսաստան

Սիրիայի նախագահ Բաշար ալ-Ասադը մարտի կեսերին պաշտոնական այցով կժամանի Ռուսաստան, հայտնել է Vedomosti-ի զրուցակիցը՝ նշելով, որ նրան կարող է ընդունել նաև ՌԴ նախագահ Վլադիմիր Պուտինը։

Սիրիայի նախագահի վերջին այցը Ռուսաստանի մայրաքաղաք տեղի է ունեցել Ուկրաինայում ռազմական գործողությունների սկսվելուց առաջ՝ 2021 թվականի սեպտեմբերի կեսերին։ Սիրիան չի վերականգնվել 12-ամյա քաղաքացիական պատերազմի հետևանքներից, գտնվում է Արևմուտքի խիստ պատժամիջոցների տակ և, հարևան Թուրքիայի հետ միասին, ծանր վնասներ է կրել փետրվարի 6-ի երկրաշարժից: Համաշխարհային բանկը ողջ երկրում աղետի վնասը գնահատել է 5,1 միլիարդ դոլար:

Առողջապահության համաշխարհային կազմակերպության տվյալներով՝ մոտ 8500 մարդ է մահացել Սիրիայում տեղի ունեցած երկրաշարժի հետևանքով, որոնց կեսը՝ Դամասկոսի վերահսկողության տակ գտնվող տարածքներում։ Ավելի քան 414 000 մարդ տուժել է, ավելի քան 4 000 շենք վնասվել կամ ավերվել է՝ ըստ սիրիական իշխանությունների:

Երկրի տնտեսական վիճակը ծայրահեղ ծանր էր նույնիսկ այս աղետից առաջ։ Հիմնական խնդիրը վառելիքի պակասն է։ Այն սրվեց 2022 թվականի դեկտեմբերին և դարձավ ամենադաժանը՝ 2011 թվականին երկրում քաղաքացիական պատերազմի սկսվելուց ի վեր։