Անկարայում ԱՄՆ դեսպանը կանչվել է Թուրքիայի ԱԳՆ․ ԶԼՄ
Համաշխարհային Մամուլ
Անկարայում ԱՄՆ դեսպան Ջեֆ Ֆլեյքը կանչվել է Թուրքիայի ԱԳՆ՝ ԱՄՆ Զինված ուժերի շտաբի պետերի միացյալ կոմիտեի նախագահ, գեներալ Մարկ Միլիի՝ Սիրիա կատարած այցի պատճառով։ Այս մասին հայտնում է ՌԻԱ Նովոստին՝ հղում անելով Անկարայում դիվանագիտական աղբյուրին։
«Այսօր Անկարայում ԱՄՆ դեսպան Ջեֆ Ֆլեյքը կանչվել է ԱԳՆ՝ կապված 2023 թվականի մարտի 4-ին ԱՄՆ շտաբի պետ Մարկ Միլիի հյուսիսարևելյան Սիրիա կատարած այցի հետ, և այս այցի վերաբերյալ բացատրություններ են պահանջվել», - ասել է ՌԻԱ Նովոստիի զրուցակիցը։
Ավելի վաղ Սիրիայի իշխանություններն անօրինական էին անվանել Միլիի այցը երկրի հյուսիս-արևելքում գտնվող ամերիկյան բազա։ Դամասկոսն ասել էր, որ այս այցը երկրի ինքնիշխանության և տարածքային ամբողջականության խախտում է։
Մարտի 4-ին հայտնի դարձավ, որ ԱՄՆ զինված ուժերի շտաբի պետերի միացյալ կոմիտեի նախագահը չհայտարարված այց է կատարել Սիրիայում գտնվող ամերիկյան ռազմաբազա։ Ինչպես հայտնում է Reuters-ը, այցի շրջանակներում Միլին գնահատել է Սիրիայում ահաբեկչական խմբավորումների դեմ պայքարում ԱՄՆ երկարաժամկետ ջանքերը, ինչպես նաև Արաբական Հանրապետությունում ԱՄՆ ռազմական անձնակազմի պաշտպանությանն ուղղված միջոցառումները:
Ամենադիտված 
Մնաս բարյավ. Րաֆֆի Հովհաննիսյան
